Ажыятаж у сталічных абменніках
80- 13.11.2013, 15:49
- 125,284
Жыхары Менска па-свойму зразумелі словы Лукашэнкі «не чакайце дэвальвацыі».
Абменнік на праспекце Незалежнасці, які належыць аднаму з камерцыйных банкаў, здзівіў прыстойнай чаргой. Пенсійнага выгляду наведвальнікі стаялі ўперамешку з работнікамі банка, піша «Салiдарнасць».
«Ой, я буду за вамі, - сказала чарговая дзяўчына ў банкаўскай форме, пакуль яе калегі куплялі да незадавальнення чаргі хто 500, а хто 600 даляраў.
На пытанне, што за ажыятаж, дзяўчына з банка паўшэптам адказала: «З дня на дзень камерцыйным банкам забароняць купляць валюту на біржы, акрамя той, што прыйдзе ад выручкі ў абменніках».
Дзяўчына замовіла адразу 900 даляраў. Мабыць, ні работнікі банка, ні астатнія жадаючыя набыць валюту, не чыталі ранішнія навіны, у якіх Нацбанк назваў чуткі пра абмежаванне абароту валюты «рэдкім глупствам».
«Брэд абсалютны. Любы разважны чалавек разумее, што ў краіне з адкрытай эканомікай, ва ўмовах Мытнага саюза і фармавання Еўразійскага эканамічнага саюза рэалізацыя такіх забаронных мер проста немагчымая», - цытуе начальніка ўпраўлення інфармацыі Нацыянальнага банка Аляксандра Цімашэнку «Інтэрфакс».
Заклікаў суайчыннікаў да спакою і Лукашэнка, падчас наведвання ААТ «Керамін».
«Вы бегаеце па абменніках і чакаеце нейкай дэвальвацыі. Проста раю вам: не рабіце гэтага і не чакайце (дэвальвацыі)», - заявіў Лукашэнка, наведваючы прадпрыемства.
Беларусы ўспрынялі словы кіраўніка як заклік да дзеяння.
Журналісты пацікавілася ў эканаміста Леаніда Злотнікава, наколькі апраўданыя асцярогі беларусаў?
«Пакуль Нацбанк яшчэ можа выкарыстоўваць нейкія рэзервы. Аднак з чэрвеня Нацбанк прадае больш валюты чым купляе. Гэта значыць, фактычна стрымлівае рост курсу даляра. Каб не было скокаў курсу, пры неабходнасці ён умешваецца і прадае валюту. Адпаведна, каб працягваць гэты працэс, патрэбная яшчэ валюта, таму што рэзерваў хопіць на пару месяцаў», - сказаў ён.
Эксперт звяртае ўвагу на тое, што ў сённяшняй заяве Нацбанка не гаворыцца, на працягу якога часу не будуць абмяжоўваць абарот валюты.
«Больш двух-трох месяцаў такой магчымасці не відаць. Другі варыянт пазбегнуць дэвальвацыі - «скінуць» на чвэрць узровень жыцця насельніцтва і прадпрыемстваў, якія куплялі больш, чым прадавалі. Імпарт знізіўся ўсяго на 10% за 8 месяцаў, а экспарт на 20% вырас. Утварыліся небяспечныя «нажніцы». Скараціўся прыток валюты ў параўнанні з адтокам. Магчыма, сёння прагучала завэлюмаванае адкрыццё Нацбанка - мы адпускаем курс, хлопцы. Потым заўсёды можна сказаць - а мы папярэдзілі. У любым выпадку, у сітуацыі калі ў краіне завышаны ўзровень спажывання, выхады два - ці панізіць узровень жыцця, ці запусціць дэвальвацыю», - адзначыў Леанід Злотнікаў.