Расейскі самалёт парушыў мяжу Эстоніі

Самалёт ВПС Расеі Ту-134 без дазволу ўварваўся ў паветраную прастору Эстоніі.

Інцыдэнт адбыўся 19 лістапада позна ўвечары, піша Postimees.

Самалёт, які накіроўваўся з Калінінграда ў Чкалаўск, увайшоў у паветраную прастору Эстоніі ў раёне выспы Вайндлоо і знаходзіўся ў эстонскай паветранай прасторы менш адной хвіліны, паведаміў генштаб Сіл абароны.

Парушэнне мяжы зарэгістраваў цэнтр кіравання паветранымі аперацыямі Эстоніі ў Эмары. Самалёт падтрымліваў радыёсувязь з эстонскім цэнтрам кіравання палётамі, яго транспондэр быў уключаны.

Нагадаем раней самалёты ВПС Беларусі і Расеі неаднаразова парушалі паветраную прастору суседніх дзяржаў ЕЗ і НАТА. Часцей за ўсё незаконна перасякаліся межы балтыйскіх краін. У прыватнасці, у ліпені расейскі Ан-26 парушыў паветраную прастору Эстоніі. Парушэнне мяжы было зарэгістравана цэнтрам паветраных аперацый краіны.

Такі ж інцыдэнт адбыўся ў Фінляндыі. Некалькі знішчальнікаў ВПС краіны былі ўзнятыя па трывозе ў паветра ў сувязі з меркаваным парушэннем паветранай прасторы расейскімі самалётамі.

Беларускі ваенны самалёт перасёк мяжу Літвы 17 красавіка. У яе паветранай прасторы ён знаходзіўся некалькі хвілін. Міністэрства абароны нашай краіны пазней заявіла, што ён быў узняты ў паветра з-за зграі птушак.

Фота: Reuters/Scanpix