Для дзяржпрадпрыемстваў увядуць «падатак на неэфектыўнасць»?

Падатак на нерухомасць у дзесяціразовым памеры могуць дазволіць спаганяць мясцовым органам улады з прадпрыемстваў, якія неэфектыўна выкарыстоўваюць памяшканні.

Пра гэта заявіў, выступаючы на форуме ў Менску, прысвечаным Сусветнаму тыдню прадпрымальніцтва, старшыня ГА «Менскі сталічны саюз прадпрымальнікаў і работадаўцаў» (МССПіР) Уладзімір Карагін, піша «Інтэрфакс».

«Гэта наша ідэя, якая ўвайшла ў нядаўна прыняты план сумесных дзеянняў Урада і Нацбанка па структурным рэфармаванні і павышэнні канкурэнтаздольнасці эканомікі: у наступным годзе мясцовым уладам даецца права павышаць стаўку падатку на нерухомасць у 10 разоў для прадпрыемстваў, якія неэфектыўна выкарыстоўваюць плошчы», - паведаміў Карагін.

Паводле яго слоў, уладамі Менска і прадпрымальнікамі было праведзенае сумеснае даследаванне эфектыўнасці выкарыстання вытворчых памяшканняў на прадпрыемствах, якія знаходзяцца ў межах горада.

«На кожнага работніка дзяржпрадпрыемстваў прыходзіцца 150 кв.м вытворчых плошчаў, у той час як у «прыватнікаў» гэты паказчык складае 48 кв. м. Пры гэтым работнікі прыватных прадпрыемстваў працуюць у тры разы больш эфектыўна ў плане атрымання кампаніяй прыбытку, чым работнікі дзяржсектара. У выніку атрымліваецца, што эфектыўнасць выкарыстання вытворчых плошчаў у прыватнага бізнесу ў 9 разоў вышэй, чым у дзяржсектары. І ў 15 разоў вышэй, чым на прадпрыемствах камунальнай формы ўласнасці», - падкрэсліў Карагін.

«Як вы думаеце - даводзіцца нам сёння ўгаворваць мэра Менска аказваць ціск на допуск прыватнага сектара на тэрыторыі прампрадпрыемстваў ў Менску? Не, вядома», - адзначыў кіраўнік МССПіР. У той жа час ён прызнаўся, што на дадзены момант 90% «прыватнікаў» не маюць сваіх вытворчых плошчаў і выступаюць у ролі арандатараў.

Чыноўнікі пацвярджаюць словы кіраўніка саюза прадпрымальнікаў. «Прыватная выкарыстоўваецца больш эфектыўна. Мясцовым органам улады ўжо прадастаўленае права ў 5 разоў павялічваць падатак на нерухомасць у дачыненні да аб'ектаў, якія не выкарыстоўваюцца або неэфектыўна выкарыстоўваюцца. Мы лічым, што гэтага недастаткова, і падатак будзе брацца ў 10 разоў вышэй. І гэта не мяжа», - распавёў намеснік дырэктара дэпартамента па прадпрымальніцтве Міністэрства эканомікі Пётр Арушаньянц.

Больш за тое - дзяржпрадпрыемствы абавяжуць прадаваць памяшканні, якія не выкарыстоўваюцца, альбо тыя, якія выкарыстоўваюцца толькі для здачы ў арэнду. «Гэта будзе абавязковае патрабаванне, аж да ўвядзення дысцыплінарнай і адміністрацыйнай адказнасці для кіраўніка, калі ён неабгрунтавана адмовіць у продажы», - заявіў Арушаньянц. «Прыходзіцца прымаць такія меры, каб павысіць эфектыўнасць выкарыстання ўласнасці», - дадаў ён.

Таксама на форуме было ўзнятае пытанне канкурэнцыі паміж дзяржаўнымі і прыватнымі кампаніямі. Усе: і прадпрымальнікі, і прадстаўнік дэпартамента па прадпрымальніцтву Мінэканомікі - пагадзіліся, што сёння ўмовы не зусім роўныя.

«Заканадаўчага акта, у якім устаноўлены прыярытэт дзяржаўных прадпрыемстваў над недзяржаўнымі, няма. Заканадаўствам створаныя роўныя ўмовы. Аднак несумленная канкурэнцыя ўзнікае ў сувязі з прыняццем галіновых ці рэгіянальных рашэнняў», - прызнаўся Арушаньянц.

Па яго словах, звязана гэта з тым, што міністэрствы адначасова выступаюць і рэгулятарамі галін, і кіраўнікамі прадпрыемстваў. «Напрыклад, сёння міністэрства прамысловасці стварае правілы ў сферы вытворчасці. У той жа час ёсць вялікая колькасць прадпрыемстваў, якія падпарадкаваныя Мінпраму. У чыю карысць будзе рэгуляваць? Натуральна, на карысць сваіх прадпрыемстваў. Мы з гэтым змагаемся - дзяржаве выгадна, каб і прыватныя, і дзяржаўныя кампаніі працавалі эфектыўна і лепш», - распавёў чыноўнік.

Арушаньянц адзначыў, што цяпер уздымаецца пытанне, каб ацэнка дзейнасці міністра і яго зарплата залежалі не ад таго, як добра працуюць падначаленыя міністэрству прадпрыемствы, а як добра працуе ўся галіна, у тым ліку і прыватныя кампаніі.

Намеснік дырэктара дэпартамента па прадпрымальніцтве Міністэрства эканомікі ўпэўнены, што дадзеная мера дапаможа ліквідаваць праблему стрымлівання канкурэнцыі па лініі дзяржпрадпрыемствы - прыватны бізнес.