Януковічу пагражае міжнародная ізаляцыя

Прымяненне сілы ўкраінскіх уладаў у дачыненні да дэманстрантаў прывядзе да ізаляцыі прэзідэнта Украіны з боку ЗША і ЕЗ.

Пра гэта заявіў былы амбасадар ЗША ў Украіне Стывен Пайфэр, перадае «Корреспондент».

«Януковіч ужыў сілу супраць дэманстрантаў, гэта небяспечны паварот падзей на Украіне. Ён будзе яшчэ больш ізаляваць яго ад ЕЗ і ЗША», - напісаў амерыканскі дыпламат на сваёй старонцы ў «Твітэры».

Увечары 29 лістапада ўдзельнікі кіеўскай акцыі прынялі рэзалюцыю, прызначыўшы народны сход апоўдні 1 снежня. Мітынгоўцы таксама запатрабавалі адстаўкі прэзідэнта Украіны Віктара Януковіча і прапанавалі стварыць каардынацыйную раду Еўрамайдана.

Сёння ноччу, а 4 раніцы, беркутоўцы ачапілі плошчу, а затым сілком выціснулі мітынгоўцаў. Пры гэтым, як адзначаюць відавочцы, сілавікі збівалі ўсіх запар.

Праваахоўнікі пры разгоне Еўрамайдана актыўна выкарыстоўвалі дубінкі і гукавыя гранаты.

Па расказах мітынгоўцаў, 35 удзельнікаў былі затрыманыя і знаходзяцца ў Шаўчэнкаўскім падраздзяленні.