Жонкі паслоў сталі за калядныя прылаўкі
8- 14.12.2013, 8:35
- 16,067
Жонка пасла Індыі прадавала сары, а жонка пасла Літвы - самаробныя каралі.
На невялікай тэрыторыі залы ў Палацы дзяцей і моладзі ў Менску сабралі сувеніры і прысмакі з усяго свету: аджарскія хачапуры, хрушчы, літоўскае імбірнае печыва, сірыйскія аліўкі, іранскія куфэркі, індыйскія прыправы, піша «Комсомольская правда в Беларуси».
Кірмаш напярэдадні калядных святаў арганізаваў Менскі міжнародны жаночы клуб. Ён аб'ядноўвае жонак паслоў ды бізнэс-лэдзі, усе грошы ад продажу калядных падарункаў і традыцыйных страў ідуць на дабрачыннасць.
- На такой невялікай тэрыторыі і так шмат краін! Шкада, нямногія ў Менску ведаюць пра кірмашы, а павінны былі б. Столькі ўсяго цікавага ды ў адным месцы. І ўсялякая ежа - хочаце кітайская, хочаце індыйская, в'етнамская, - кажа пасол Індыі Манодж Кумар Бхарці.
Рэдкая грузінская чурчхела проста з рук работнікаў амбасады разышлася даслоўна за некалькі хвілін.
- Пасля дзвюх гадзін людзей на кірмашы будзе больш! Спачатку звычайна прыходзяць супрацоўнікі пасольстваў, бізнэсоўцы - яны больш за ўсіх ведаюць пра кірмашы. А потым і астатнія людзі пачынаюць прыходзіць, - распавядае «Міс Сірыя-2000» і бізнэс-лэдзі Абэйт Іўлін. - Аб гэтым кірмашы мы абвяшчалі за месяц-два. Людзі чакаюць, прыходзяць, ім падабаецца. Усходнія тавары - прыправы, аліўкавы алей - але іх нялёгка знайсці. Усе грошы, заробленыя тут, ідуць на дабрачыннасць, у клуб, а клуб карыстаецца імі цягам года. Дзякаваць богу, кожны год з базару добры даход. У мяне трое дзяцей, яны збіраюць дома ўсё, што ім не трэба, прыходзяць на кірмаш і таксама прадаюць. Не ведаю, як у астатніх, а тавары з Сірыі заўсёды вельмі хутка разыходзяцца. Увечары ў нас нічога ўжо няма.
- Каго вы паставілі за прылавак? - пацікавіліся журналісты ў амбасадара Літвы Эвалдаса Ігнатавічуса.
- Тут мая жонка - яна прадае каралі, якія сама зрабіла. Тут жонкі і іншых дыпламатаў. Як напярэдадні дзяўчаты рыхтаваліся! Супер! Нават знялі гэта на відэа, выглядала як сапраўдныя Каляды.