Салігорскія ўлады забаранілі мітынг супраць падатку на аўто

Салігорскі райвыканкам забараніў правядзенне акцыі на мясцовым стадыёне «Будаўнік».

На думку выканкамаўскіх ідэолагаў, якія займаліся падрыхтоўкай адказу на заяву, арганізатары масавага мерапрыемства пазначылі недастаткова мер па ахове грамадскага парадку, забеспячэнні медыцынскім абслугоўваннем падчас правядзення мітынгу і ўборцы тэрыторыі пасля мерапрыемства, паведамляе сайт ПЦ «Вясна».

Адказ чыноўнікаў ініцыятары мерапрыемства называюць некампетэнтным і проціпраўным. Па-першае, па незразумелых прычынах ідэолагі пішуць аб забароне пікетавання, хоць у заяўцы на мерапрыемства вялася гаворка пра мітынг на 200 чалавек. Па-другое, просьбу аб ускладанні абавязкаў па ахове парадку, медыцынскім абслугоўванні і ўборцы тэрыторыі на органы мясцовай улады цяжка назваць недастатковымі, так як гэта звычайная сусветная практыка і прамой доўг дзяржавы.

Зрэшты, арганізатары мерапрыемства канчатковае рашэнне аб магчымым абскарджанні забароны на правядзенне мітынгу пакуль не прынялі.