Дыктатар адчыніў сямейную скарбонку?

Сума выплат замежнай запазычанасці Беларусі неспадзеўкі павялічылася на 400 мільёнаў даляраў.

На разбежнасць у лічбах звярнуў увагу блогер sergiscorp.

Паводле планаў урада, у 2014 годзе сплата і абслугоўванне замежнай запазычанасці мусілі скласці 3,2 мільярда даляраў. Пра гэта неаднаразова заяўлялі чыноўнікі рознага ўзроўню.

Больш за тое, толькі некалькі дзён таму ў інтэрв'ю "Народнай газеце" намеснік міністра фінансаў Максім Ермаловіч пацвердзіў планы ўрада аб выплаце запазычанасці $ 3,2 млрд у 2014 годзе.

Аднак сёння прэм'ер-міністр Беларусі Міхаіл Мясніковіч агучыў іншую лічбу: выдаткі на абслугоўванне і выплату запазычанасці ў 2014 годзе складуць $ 3,6 млрд.

"За пару дзён Урад пазычыў яшчэ 400 млн даляраў! Аддаць якія трэба ў 2014 годзе. Гэтае значыць, фактычна - грошы пазычаныя "да заробку" пад вельмі гарачы адсотак, відавочна", - робіць выснову блогер і нагадвае, што падобная сітуацыя здарылася ў чэрвені 2010 года, калі завінавачанасць Беларусі перад "Газпромам" аплаціў невядомы дабрадзей. Лукашэнка пазней прызнаўся, што 200 млн даляраў на аплату завінавачанасці нібыта пазычыў прэзідэнт Азербайджана Ільхам Аліеў. Экспэрты не выключалі, што гаворка ў гэтым выпадку ішла аб асабістых грошах беларускага правадыра.

Як дзіўна супала, у Азербайджан Аляксандр Лукашэнка ездзіў надоечы, у канцы лістапада 2013 года.

Блогер, які адсочвае сітуацыю на валютным рынку Беларусі, звяртае ўвагу, што ў лістападзе і снежні на біржы з'явіліся незапланаваныя 160-210 млн і 80-100 млн даляраў адпаведна, што і дазволіла адтэрмінаваць падзенне беларускага рубля.

З гэтай нагоды блогер прадказаў магчымы тэрмін выдачы пільнай дапамогі з невядомай крыніцы для ўтрымання валютнага рынку - канец першага квартала 2014 года. Менавіта столькі Лукашэнкі адмераў беларускаму ўраду для развязання праблемы.

Нагадаем, міжнародныя экспэрты ацэньваюць багацце сям'і Лукашэнкі ў суму ад 8 да 12 мільярдаў даляраў. Грошы ўкладзеныя ў прыбытковыя доўгатэрміновыя праекты за межамі краіны.