Менскі вінзавод зладзіў багемную вечарыну ў французскім стылі

Менскі завод пеністых вінаў зладзіў вечар-дэгустацыю «Шарм па-французску» ў Нацыянальнай школе прыгажосці.

На свята, па словах арганізатараў, прыйшлі вяршкі грамадства: вядомыя палітыкі, спартсмены, публічныя персоны. Запрашэнне «акунуцца ў непаўторную атмасферу Францыі, ацаніць элегантны французскі стыль і атрымаць асалоду ад букета вытанчанага шампанскага» атрымалі і карэспандэнты onliner.by.

Па прыступках другога паверха Нацыянальнай школы прыгажосці спускаўся сумны Іван Айплатаў. Мабыць, для сябе дызайнер ужо прыняў рашэнне: не атрымліваць асалоду ад букета шампанскага ў гэты вечар.

Гасцей свята сустракалі апранутыя ў парыкі французскія лакеі і дзяўчаты ў сталах, якія перамяшчаліся. Госці неяк няўпэўнена падыходзілі да куфляў шампанскага і закусак. У халодным памяшканні жанчынам, якія апрануліся, згодна з дрэс-кодам, у кактэйльныя сукенкі, прыйшлося хутацца ў шалікі.

Сярод заяўленых у праграме «вядомых палітыкаў, спартсменаў і публічных персон» журналісты апазналі толькі спявачку Жанэт - фіналістку нацыянальнага адбору на «Еўрабачанне-2014». Размова з ёй мімаволі зайшла пра маючае адбыцца музычнае спаборніцтва.

«Я ўвогуле не вельмі люблю такія конкурсы. Для мяне «Еўрабачанне» - гэта ўсяго толькі чарговае мерапрыемства. Я не магу сказаць, што для мяне як для спявачкі гэта важней, чым канцэрт у Барысаве ці ў Лідзе. Там таксама людзі», - сказала Жанет.

Тым часам на подыум выйшлі вядучыя і афіцыйна адкрылі вечар: «Сёння вас чакае крышачку Францыі, багемнасці, каб адчуць цудоўны густ нашага выдатнага напою».

Галоўны інжынер Менскага завода пеністых вінаў Аляксандр Філіпеня распавядаў пра папулярнасць менскага шампанскага - ні больш ні менш - ва ўсім свеце: «Наша прадукцыя карыстаецца заслужаным аўтарытэтам. Пастаўляем пеністыя віны ў Ізраіль, Амерыку. Нядаўна вось буйную партыю ў Аўстралію адправілі... Хочацца, каб кожны выпіў гэты напой у навагоднюю ноч!»

Гасцям настойліва налівалі шампанскае і забаўлялі як маглі. Спачатку - выступленнем танцораў, потым - дэманстрацыяй калекцыі французскага адзення. Публіка рэагавала вяла. Злёгку ажывіліся госці, мабыць, падчас паказу «адзення для сапраўдных мужчын» ад салона Confident. Мабыць, на прысутных зрабіла ўражанне харызматычнасць мадэляў мужчынскага полу.

Пасля шматлікіх дэманстрацый адзення ўсе госці спусціліся на першы паверх, каб прыступіць да дэгустацыі элітных гатункаў «Савецкага шампанскага».

«Нашу прадукцыю ўмоўна можна назваць нашчадкамі відаў французскага шампанскага, - запэўнівала начальнік аддзела продажаў і маркетынгу Менскага завода пеністых вінаў Ірына Пашкевіч. - Адна бутэлька элітнага віду «Савецкага шампанскага» нараджаецца на свет дзевяць месяцаў. Гэта як нараджэнне чалавека».

Самелье Аляксей Міхальчанка шмат казаў пра «арыстакратычную раскошу» і настойваў на тым, што навінка пад назвай Grand de Luxe «парадуе сапраўдных гурманаў». Пасля дэгустацыі гэтага гатунку шампанскага і, мабыць, у працяг тэмы каралеўскай Францыі перад гасцямі выступіла зорка «Шансон-ТВ» з песняй «Любит не любит, а к сердцу прижмет».