У Іране арыштавалі дачок лідэра апазіцыі

Іранскія ўлады затрымалі дачок аднаго з лідэраў апазіцыі Мір-Хасэйна Мусаві.

Сам ён разам са сваёй жонкай Захрай Рахнавард з 2011 года знаходзіцца пад хатнім арыштам. Пра гэта ў панядзелак паведамляе Reuters са спасылкай на іранскі апазіцыйны сайт, піша Lenta.ru.

Сёстры Наргес і Захра былі затрыманыя ў сябе дома. Куды іх адвезлі супрацоўнікі праваахоўных органаў, застаецца невядомым.

Усяго ў Мусаві трое дачок. У студзені 2013 года яны выпусцілі заяву, у якой скардзіліся, што ўлады забараняюць іх бацькам кантактаваць з імі на працягу доўгага часу.

Мір-Хасэйн Мусаві быў прэм'ер-міністрам Ірана ў 1980-х гадах. У 2009 годзе ён вырашыў вярнуцца ў палітыку і выступіў адным з апазіцыйных кандыдатаў на прэзідэнцкіх выбарах. Затым ён актыўна ўдзельнічаў у вулічных пратэстах супраць фальсіфікацый падчас галасавання, па выніках якога перамог Махмуд Ахмадзінежад.

У 2011 годзе, на хвалі «арабскай вясны», Мусаві і іншы апазіцыянер, Мехдзі Карубі, спрабавалі зноў арганізаваць масавыя дэманстрацыі ў Іране. За гэта абодва яны былі «абмежаваныя ў кантактах», што фактычна азначала хатні арышт. Фармальна яны так і не былі арыштаваныя або асуджаныя.

У чэрвені 2013 года ў Іране адбудуцца чарговыя прэзідэнцкія выбары. Апазіцыю ўжо абвінавацілі ў тым, што яна зноў намышляе мяцеж.