4 лiпеня 2015, Субота, 1:01

«Бедным» чыноўнікам рэзка павысілі зарплаты

144

Віцэ-прэм'еры і міністры РБ, а таксама іншыя чыноўнікі атрымалі істотную прыбаўку да сваіх міністэрскіх заробкаў.

Прыбаўка адбылася за кошт рэзкага павышэння сумы ўзнагароджання на «другой працы» - прадстаўнік дзяржавы ў органах кіравання гаспадарчага грамадства.

Згодна з указам №74 ад 8 лютага 2013 года нарматывы ўзнагароджання чыноўніка за нагляд над прадпрыемствам былі павышаныя з 6 да 20 базавых велічынь у квартал пры рэнтабельнасці прадпрыемства да 10% уключна; з 9 да 25 базавых велічынь - пры рэнтабельнасці ад 10% да 15% уключна ; з 15 да 45 базавых велічынь - пры рэнтабельнасці ад 15% да 25% уключна; з 18 да 55 базавых велічынь - пры рэнтабельнасці звыш 25%, піша АФН.

Самае вялікае павышэнне дадатковага заробку будзе ў чыноўнікаў, якія прадстаўляюць інтарэсы дзяржавы ў банках - нарматыў павышаны з 25 да 75 базавых велічынь у квартал.

Гэтым жа ўказам № 74 заканадаўча замацаванае права віцэ-прэм'ераў РФ на дадатковы заробак у камерцыйных прадпрыемствах.

«Прадстаўнікамі дзяржавы ў органах кіравання гаспадарчых таварыстваў могуць таксама з'яўляцца намеснікі прэм'ер-міністра Рэспублікі Беларусь, кіраўнікі рэспубліканскіх органаў дзяржаўнага кіравання і іншых дзяржаўных арганізацый, падпарадкаваных ураду Рэспублікі Беларусь, і іх намеснікі...», - гаворыцца ў дакуменце.

Праўда, цяпер пры прызначэнні прадстаўнікоў дзяржавы ў банкі Саўміну прыйдзецца ўлічваць меркаванне Нацбанка РБ.

«Прадстаўнікі дзяржавы ў органах кіравання банкаў, акцыі якіх належаць Рэспубліцы Беларусь, прызначаюцца Саветам Міністраў Рэспублікі Беларусь сумесна з Нацыянальным банкам», - гаворыцца ва ўказе.

Літаральна напярэдадні падпісання ўказу №74 Саўмін сваёй пастановай №85 ад 6 лютага 2013 года ўнёс новых членаў урада і міністраў у «ведамасць» на атрыманне дадатку да афіцыйнага акладу.

Так, віцэ-прэм'ер Пётр Пракаповіч прызначаны прадстаўніком дзяржавы ў ААТ «БПС-Ашчадбанк». У сваю чаргу віцэ-прэм'ер Міхаіл Русы і міністр сельскай гаспадаркі Леанід Заяц будуць карміцца за кошт ААТ «Белаграпрамбанк».

Нагадаем, што прэм'ер РБ Міхаіл Мясніковіч «падзарабляе» ў Банку развіцця, а першы віцэ-прэм'ер Уладзімір Сямашка - у Прыёрбанку.

Варта адзначыць, што ўказам №74 прыкметна пашыраны паўнамоцтвы ўрада на кіраванне буйнымі прадпрыемствамі. Так, у выпадку адчужэння аб'екта нерухомасці або пакета акцый, якія знаходзяцца ва ўласнасці прадпрыемства з доляй дзяржавы больш за 50%, коштам звыш 10 тысяч базавых велічынь Саўміну больш не трэба ўзгадняць сваё рашэнне (пазіцыю) з Лукашэнкам.

падзяліцца