«Дзень без навін»: ААН у абарону журналістаў
3- 23.02.2013, 17:21
Генеральны сакратар ААН Пан Гі Мун заклікаў гарантаваць бяспеку журналістам і абвясціў пра кампанію «Дзень без навін».
Кампанія закліканая звярнуць увагу на журналістаў, якія церпяць запалохванні, арышты і пераслед, паведамляе сайт ААН.
«Штотыдзень забіваюць аднаго журналіста проста за тое, што ён выконвае сваю працу. Дзевяць з дзесяці выпадкаў такіх забойстваў застаюцца беспакаранымі», - заявіў Генеральны сакратар у сваім відэазвароце.
Пан Гі Мун падкрэсліў, што за апошнія 10 гадоў пры выкананні абавязкаў былі забітыя больш за 600 журналістаў. Шмат іншых сталі ахвярамі пагроз і здзекаў.
У мінулым годзе быў забіты 121 журналіст. Траціна з іх - ахвяры гвалту ў Сірыі.
«Кожнае забойства - гэта дзень без навін», - заявіў кіраўнік ААН. Ён падкрэсліў, што бяспека журналістаў і барацьба з беспакаранасцю тых, хто на іх нападае, значыць абарону свабоды выказвання меркаванняў і права на жыццё, свабоду і бяспеку.
Генеральны сакратар нагадаў пра План дзеянняў ААН для гарантавання бяспекі журналістаў і супрацьдзеяння беспакаранасці.