5 траўня 2015, aўторак, 3:13

Годнасць псэўдапрафэсара Шэйману надаў Чаргінец?

147

Мікалай Чаргінец узначальвае беларускую філію няіснай расейскай акадэміі.

Гэта вынікае з пераліку рэгіянальных кіраўнікоў Акадэміі праблем бяспекі, абароны і правапарадку, які падае ўкраінскі сайт euroindex.ua.

Нагадаем, у дзень прызначэння Віктара Шэймана на новую пасаду на сайце БелТА з'явілася афіцыйная біяграфія чыноўніка, у якой публічна паказана наяўнасць у яго навуковай годнасці «прафэсар».

Напраўду Віктар Шэйман не з'яўляецца навукоўцам і да навукі не мае аніякага дачынення, а наданне самому сабе навуковай годнасці - гэта толькі чарговая бутафорыя ў ягонай вялікай калекцыі фальшывых узнагарод і рангаў.

Акадэмія праблем бяспекі, абароны і правапарадку Расейскай Федэрацыі была зліквідаваная 10 снежня 2008 пастановай Вярхоўнага Суда паводле заявы Генеральнага пракурора Расеі.

«Праверкай, праведзенай Генеральнай пракуратурай РФ супольна з ФСБ Расеі, ФПС Расеі, Мінюстам Расеі, Расадукнаглядам, Геральдычнай Радай пры прэзідэнце Расейскай Федэрацыі, былі выяўлены шматлікія парушэнні заканадаўства ў дзейнасці названай грамадскай арганізацыі. Акадэмія, з'яўляючыся грамадскай арганізацыяй, незаконна пазіцыянавала сябе як дзяржаўная структура з адпаведнымі паўнамоцтвамі. Падчас сваёй дзейнасці незаконна выкарыстоўвала знакі і атрыбуты дзяржаўнай улады, у тым ліку - штандар прэзідэнта Расейскай Федэрацыі», - гаворыцца ў паведамленні Генеральнай пракуратуры.

Таксама акадэмія незаконна надавала спецыяльныя рангі, якія супадаюць з вайсковымі рангамі ў Расеі і выкарыстоўвала ўзоры формавага абмундзіравання, аналагічныя вайсковай форме.

Супрацоўнікам акадэміі выдавалі службовыя пасведчанні, што маюць падабенства з пасведчаннямі дзяржузору, якія выкарыстоўваліся імі ў асабістых мэтах, што «стварала ўмовы для карупцыйных з’яў і дыскрэдытавала дзяржаўную ўладу». Былі факты выкарыстання службовых пасведчанняў Акадэміі падчас учынення злачынстваў, зазвычай махлярскіх дзеянняў у асабліва буйных сумах, адзначана ў паведамленні.

Чальцам акадэміі надавалі адмысловыя годнасці - правадзейны чалец акадэміі, чалец-карэспандэнт акадэміі, а таксама ганаровыя годнасці «Заслужаны дзеяч навукі АБАП» і «Заслужаны юрыст АБАП» з уручэннем адпаведных нагрудных знакаў і пасведчанняў.

Дысэртацыйная рада і найвышэйшы атэстацыйны камітэт акадэміі надавалі навуковыя ступені і годнасці (доктар навук, кандыдат навук, прафэсар, дацэнт). Узоры дыпломаў і атэстатаў, якiя выдаваліся акадэміяй, мелі падабенства з дыпломамі і атэстаты дзяржузору, што не выключала іх выкарыстанне ў якасці такіх.

У адпаведнасці з дзейным заканадаўствам, перад прызначэннем на новую пасаду Шэйман абавязаны быў падаць уласнаручна запоўненыя анкету і аўтабіяграфію. Непасрэдна ў анкеце маецца пункт № 6 «Навуковая ступень, навуковая годнасць (калі нададзеная, нумары дыпломаў)». Вось у гэтай графе і павінна быць пазначана, што ён з'яўляецца прафесарам АБАП.

Ужо на падставе названых хлуслівых звестак лукашэнкаўскай адміністрацыяй была перададзеная не адпаведная рэчаіснасці інфармацыя ў дзяржаўнае тэлеграфнае агенцтва.

падзяліцца