Дырэктар «Магілёўтрансмаша» спрабаваў схаваць няшчасны выпадак

Спрабуючы схаваць праўду пра няшчасны выпадак на вытворчасці, дырэктар завода «Магілёўтрансмаш» хацеў падкупіць правяраючага інспектара.

Пра гэта ў лісце сайту charter97.org паведаміў чытач Зміцер Зелікаў.

Няшчасны выпадак адбыўся з яго жонкай Яўгеніяй Зелікавай на прадпрыемстве «Магілёўтрансмаш» з-за халатнасці кіраўніцтва.

Жанчына выйшла на працу пасля дэкрэтнага адпачынку. Завод прызначыў ёй стажыроўку ў пяць змен, але не накіраваў на медкамісію. Таксама не быў вызначаны работнік, адказны за праходжанне стажыроўкі.

Яўгенія Зелікава прыступіла да выканання задання па нарэзцы разьбы ў гайках, але метчык чамусьці не ўстаўляўся ў патрон, і яна звярнулася да майстра Наталлі Жыдковай з просьбай аб дапамозе. Майстар у сваю чаргу ўключыла станок і, матывуючы тым, што патрон хутказдымны, ўсталявала інструмент у механізм. Яўгенія Зелікава прыступіла да працы, але неўзабаве метчык зламаўся. Ёй у грубай форме адмовілі ў дапамозе, загадаўшы ліквідаваць праблему самастойна па аналагічнай схеме. Жанчыну зачапіла за руку, а затым стала намотваць валасы на станок.

У выніку няшчаснага выпадку жонка аўтара атрымала пералом некалькіх шыйных пазванкоў з разрывам спіннога мозгу, скальпаваную рану галавы і ўдар лёгкага. Пасля месяца ў рэанімацыі і месяца рэабілітацыі Яўгенія Зелікава можа толькі трохі рухаць рукамі. У першы месяц завод аказваў пацярпелай дапамогу, але потым перастаў.

Кіраўніцтва прадпрыемства спадзявалася, што пацярпелая не выжыве і пра праўду ніхто не даведаецца. Таму былі падробленыя подпісы работніцы ў розных дакументах, з мэтай схаваць халатнасць кіраўніцтва і праўду пра тое, што адбылося. Даведаўшыся, што жанчына будзе жыць, дырэктар «Магілёўтрансмаша» спрабаваў падкупіць правяраючага інспектара і прасіў павялічыць адсотак віны супрацоўніцы.