Саліст Litesound: «Гэта проста беззаконне сілавых структур!»

Удзельнік гурта Litesound Уладзімір Каракін распавёў пра тое, як іх з братам затрымалі каля рэзідэнцыі Лукашэнкі.

Нагадаем, удзельнікі гурта Litesound браты Уладзімір і Зміцер Каракін 12 сакавіка шукалі ў лесе месца для здымак новага кліпа, калі іх затрымалі супрацоўнікі міліцыі, піша «Салідарнасць».

Па словах Уладзіміра Каракіна, лес у раёне Заслаўскага вадасховішча яны выбралі не выпадкова:

- Мы жывем непадалёк. Ведаем, што прыгожыя дарогі знаходзяцца ў тых месцах...

Музыкі і выказаць здагадку не маглі, што тут знаходзіцца рэзідэнцыя Лукашэнкі.

- Там быў знак «Цагліна», які не распаўсюджваецца на пешаходаў. У Беларусі тысячы такіх знакаў! - кажа Уладзімір Каракін.

Калі ўдзельнікі гурта Litesound зайшлі ўглыб лесу, яны ўбачылі высокі плот і калючы дрот.

- Мы спыніліся ў метрах 150 ад гэтага плота і пачалі глядзець па карце, што там знаходзіцца, - успамінае музыка. - У гэты час нас паклікаў ахоўнік, які стаяў на вышцы. Ён папрасіў нас падысці і сказаў, што сюды ўжо едзе машына ўнутранай аховы.

Праз некалькі хвілін на месца пад'ехалі два аўтамабілі, адзін з якіх - міліцэйскі. У другой машыне знаходзіліся людзі ў цывільным, якія аддавалі ўказанні міліцыянтам.

- Гэтыя людзі не прадставіліся, - адзначыў Уладзімір Каракін. - Нам сказалі аддаць мабільныя тэлефоны. Потым яшчэ пад'ехалі людзі... Мы патлумачылі, хто мы і што выбіраем месца для здымак кліпа. Але было відаць, што нам не вераць.

Сілавікі абшукалі машыну музыкаў, знайшлі там відэакамеру, доўга яе глядзелі, хоць там, па словах Каракіна, нічога не было.

- Пры гэтым нам не давалі патэлефанаваць бацькам, якія хваляваліся. Мы з імі дамовіліся сустрэцца ў тых месцах... Дзіма літаральна маліў гэтых людзей даць патэлефанаваць!

Як распавёў Уладзімір Каракін, сілу да іх ужылі толькі адзін раз - калі забіралі тэлефоны.

- У Дзімы выхапілі мабільнік, заламалі яму рукі. Ён паспеў крыкнуць, што з намі адбываецца. Пасля гэтага мы яшчэ каля гадзіны прабылі на марозе, чакалі прыбыцця нейкага спецыяліста. Нам абсалютна не тлумачылі, што адбываецца. Цудам на гэтай лясной дарозе нас знайшлі бацькі.

Пасля іх з'яўлення паводзіны супрацоўнікаў міліцыі змяніліся. Нам ужо не трэба было чакаць незразумелага спецыяліста, і мы адразу паехалі ў аддзяленне міліцыі. Правялі там гадзіны тры. Нас апытаў чалавек у цывільным, які не прадставіўся. Да дзесяці вечара мы былі на волі. Пратаколы на нас не складалі.

Уладзімір Каракін абураны тым, што адбылося:

- Гэта проста беззаконне сілавых структур! Падстаў нас затрымліваць не было. Крыўдна, што страцілі дзень. Дарэчы, намі займаліся начальнікі. Па-мойму, у краіне хапае сапраўдных праблем... Людзі атрымліваюць зарплату за тое, што займаюцца сур'ёзнай справай, а замест гэтага яны затрымлівалі нас у лесе. Я ўжо не кажу, колькі было выдаткавана на бензін. І гэта ўсё на нашы падаткі!