Дзяржава «адняла» дадатковыя пенсіі шахцёраў

«Беларуськалій» перадае дамовы пенсійнага страхавання работнікаў у дзяржаўную арганізацыю.

Канцэрн «Белнафтахім» і Міністэрства фінансаў Беларусі выпрацавалі і рэалізуюць план мерапрыемстваў па перадачы абавязацельстваў па дамовах добраахвотнага страхавання дадатковых пенсій работнікаў ААТ «Беларуськалій» у дзяржаўную страхавую арганізацыю, паведамляе БелТА.

Абавязацельствы перадаюцца рэспубліканскаму даччынаму ўнітарнаму страхавому прадпрыемству «Стравіта» (100-адсоткавае даччынае прадпрыемства «Белдзяржстраха»). Гэты план распрацаваны ў мэтах выканання даручэнняў кіраўніка дзяржавы і Савета Міністраў Беларусі з улікам захавання інтарэсаў страхавальнікаў, застрахаваных асоб і дзяржавы. Праца па перадачы абавязацельстваў страхавання дадатковых пенсій работнікаў ААТ «Беларуськалій» з прыватнай ў дзяржаўную страхавую арганізацыю будзе скончаная ў тэрмін да 30 сакавіка 2013 года.

Нагадаем, 1 сакавіка на пасяджэнні Савета Міністраў кіраўнік КДК Аляксандр Якабсон звярнуў увагу на тое, што значныя дзяржаўныя сродкі накіроўваюцца буйнымі прадпрыемствамі такімі, як «Беларуськалій», «Брэстэнерга», «Гроднаэнерга» і іншымі, на добраахвотнае страхаванне дадатковай пенсіі.

«Гэтыя сродкі дзяржаўных прадпрыемстваў пералічваюцца прыватнай страхавой кампаніі «Беларускі народны страхавы пенсійны фонд», якая размяшчае іх на дэпазітах у банках, а атрыманыя ад гэтага даходы выкарыстоўваюць у асабістых інтарэсах акцыянеры гэтага грамадства (дырэктар і яе муж, а таксама некаторыя іншыя камерцыйныя структуры) . Так, сярэдняя зарплата дырэктара ў 2012 годзе складала 30 мільёнаў рублёў, а атрыманыя дывідэнды мужа і жонкі за год склалі амаль тры мільярды», - адзначыў старшыня КДК.

«Можа быць, там Кірыенка (генеральны дырэктар «Беларуськалія») не на месцы, калі ён элементарнае пытанне не можа вырашыць? - усумніўся Лукашэнка. - Вінаваты Кірыенка - у турму яго. Вінаваты Жылін - следам».