Тарыфы на прымусовую эвакуацыю аўто паднялі ў 8 разоў

Менгарвыканкам устанавіў новыя тарыфы па эвакуацыі і захоўванню адбуксіраваных аўтамабіляў на ахоўнай стаянцы.

Пра гэта гаворыцца ў рашэнні Менгарвыканкама № 469 ад 28 лютага 2013 года «Аб тарыфах на работы (паслугі) па прымусовай адбуксіроўцы (эвакуацыі), а таксама захоўванню транспартных сродкаў».

У рашэнні адзначаецца, што яно прынята ў мэтах выканання ўказу Лукашэнкі ад 17 студзеня 2013 г. № 36 «Аб некаторых пытаннях прымусовай адбуксіроўкі (эвакуацыі) транспартных сродкаў».

Згодна з рашэннем, прымусовая адбуксіроўка ТС на ахоўную стаянку з поўнай пагрузкай на эвакуатар (дастаўка) будзе каштаваць 380.000 рублёў. Прымусовая адбуксіроўка ТС на ахоўную стаянку з частковай пагрузкай на эвакуатар абыйдзецца ў 300.000 рублёў. Захоўванне прымусова эвакуяванага транспартнага сродку на ахоўнай стаянцы на працягу 1-3 сутак абыйдзецца Br50 тыс. за суткі. Тое ж за 4-10 сутак захоўвання - па Br30 тыс. за суткі, тое ж за 10 і наступныя суткі захоўвання - па Br20 тыс. за суткі.

Раней тарыфы рэгуляваліся Мінэканомікі. Адбуксіроўка з поўнай пагрузкай абыходзілася аўтамабілісту ў 40 тыс. рублёў, эвакуацыя з частковай пагрузкай - 38 тысяч. Захоўванне на штрафной стаянцы - 7 тыс. рублёў за суткі. Такім чынам, паслугі па эвакуацыі выраслі ў сярэднім у 8-9 разоў.