Лаўрэаты прэміі Гедройца - Някляеў, Бахарэвіч і Глобус
4- 2.03.2013, 11:58
Цырымонія ўзнагароджання пераможцаў прайшла ў пятніцу ў Менску.
Лаўрэатаў прэміі журы выбрала з шасцярых намінантаў. Першапачаткова на атрыманне прэміі прэтэндавалі 43 аўтары, піша «Радыё Свабода».
Адам Глобус за кнігу «Сказ» стаў лаўрэатам 3-й прэміі імя Гедройца. Ён узнагароджаны стыпендыяй ва Уроцлаве.
Альгерд Бахарэвіч - лаўрэат 2-й прэміі імя Гедройца за кнігу «Гамбургскі рахунак». Яго прадставіў Барыс Пятровіч, старшыня Саюза пісьменнікаў. Прыз для лаўрэата - творчы адпачынак на шведскім востраве Готланд.
Уладзімір Някляеў стаў лаўрэатам 1-й прэміі імя Гедройца. Ён узнагароджаны за раман «Аўтамат з газіроўкай з сiропам І без».
Пісьменнік атрымаў грашовую прэмію ў 10 тысяч еўра і магчымасць выдання перакладу сваёй кнігі ў Польшчы.
У цырымоніі ўзнагароджання бралі ўдзел амбасадар Польшчы ў Беларусі Лешэк Шарэпка, дырэктар Польскага інстытута ў Менску, дарадца пасла Пётр Казакевіч, сябры журы прэміі, аўтары, якія ўвайшлі ў шорт-ліст.
Літаратурная прэмія імя Ежы Гедройца была заснаваная ў канцы снежня 2011 года і ўручаецца з 2012 года за лепшую кнігу прозы, якая выйшла ў папярэднім годзе на беларускай мове на папяровым або электронным носьбітах.
Заснавальнікі прэміі - Пасольства Рэспублікі Польшча ў Рэспубліцы Беларусь, Польскі Інстытут у Менску, Беларускі ПЭН-цэнтр, Саюз беларускіх пісьменнікаў і польска-беларускае прадпрыемства ЗАТ «Сомбелбанк».
