Уладзіміра Яроменка затрымалі адразу пасля выхаду з турмы

Міліцыя прэвентыўна затрымала былога палітвязня перад Днём Волі.

Пра гэта актывіст «Маладога фронту» і былы палітычны вязень Уладзімір Яроменак паведаміў charter97.org.

«На жаль, мне не ўдалося паўдзельнічаць у акцыі, прымеркаванай да Дня Волі. Я павінен быў выйсці на волю пасля трох дзён арышту турмы на Акрэсціна, але з цэнтра ізаляцыі правапарушальнікаў мяне забралі супрацоўнікі Першамайскага РУУС і даставілі ў аддзел, дзе я прабыў да 15:00. Я зусім нядаўна вярнуўся дадому», - падкрэсліў былы палітвязень.

Ён адзначыў, што збіраецца абскардзіць свой арышт у судовым парадку.

«Безумоўна, касацыйная скарга будзе пададзеная, але крыху пазней. Цяпер у мяне ёсць шмат іншых спраў, якія трэба развязаць. Я толькі што вярнуўся дадому і нават не чытаў навін. Пасля арышту ў мяне былі праблемы са здароўем, але цяпер, на шчасце, я адчуваю сябе даволі добра», - сказаў на заканчэнне актывіст.

Нагадаем, былога палітвязня Уладзіміра Яроменка арыштавалі перад Днём Волі на тры дні. Да гэтага Суд Першамайскага раёна Менска на 6 месяцаў падоўжыў прэвентыўны нагляд у дачыненні да актывіста «Маладога фронту».

Уладзімір Яроменак у студзені 2011 года быў арыштаваны, як падазраваны ў справе «аб масавых беспарадках». Быў асуджаны на тры гады. Адбываў пакаранне ў калоніі пад Віцебскам. У жніўні 2011 года ў ліку іншых фігурантаў быў памілаваны. З тых часоў яшчэ некалькі разоў апынаўся за кратамі паводле адміністрацыйных артыкулаў.