Макей распавёў пра канікулы Лукашэнкі

Кіраўнік МЗС Беларусі расхвальвае паездку беларускага кіраўніка ў Сінгапур і Інданезію.

Беларусь мае намер узмацніць сваю дыпламатычную прысутнасць у Паўднёва-Усходняй Азіі, заявіў сёння міністр замежных спраў Беларусі Уладзімір Макей у інтэрв'ю журналістам, адказваючы на пытанне БелТА аб выніках візітаў Аляксандра Лукашэнкі ў Інданезію і Сінгапур.

«Мы маем намер узмацніць сваю дыпламатычную прысутнасць у дадзеным рэгіёне з улікам таго, што гэтыя краіны з'яўляюцца членамі АСЕАН, і мы маем намер праз Інданезію і Сінгапур актыўна ўзаемадзейнічаць з іншымі краінамі-членамі гэтай арганізацыі. Перакананы, што гэты візіт, які даў сур'ёзны штуршок развіццю нашага ўзаемадзеяння з гэтым рэгіёнам, у будучыні акупіцца новымі кантрактамі і пагадненнямі», - сказаў міністр.

Як адзначыў Уладзімір Макей, візіты, якія прайшлі, шырока асвятляліся ў СМІ, аднак яго «некалькі здзівілі яхідствы некаторых зашораных эканамістаў ад апазіцыі, якія кажуць: «Навошта мы туды пайшлі? Нічога мы адтуль не прывезлі, ніякай перспектывы ў нас там няма». «У цэлым па выніках візітаў у гэты рэгіён заключаныя пагадненні і кантракты на 400 млн. даляраў. Скажыце, гэта дрэнна для краіны ці добра?» - задаўся пытаннем кіраўнік знешнепалітычнага ведамства.

Нагадаем, 17-22 сакавіка беларускі кіраўнік здзяйсняў дзяржаўныя візіты ў Інданезію і Сінгапур.

Фота: БелТА