Міліцыя сарвала чарговую акцыю ў Віцебску

Актывіст руху «За Свабоду» атрымаў ад віцебскіх міліцыянтаў чарговую адмову забяспечваць парадак на масавай акцыі.

Кіраўнік абласной структуры руху «За Свабоду» Хрыстафор Жэляпаў звярнуўся ў МУС, калі атрымаў адмову на абслугоўванне масавага мерапрыемства. Згодна з адпаведным рашэннем гарвыканкама, дазвол на акцыі можна атрымаць, толькі маючы такія пагадненні, перадае ПЦ «Вясна».

«Нам напісалі з міліцэйскага ўпраўлення, што дамову заключаць толькі пасля таго, як мы атрымаем дазвол з Першамайскай раённай адміністрацыі. А ў раённай адміністрацыі патрабуюць дамову першапачаткова. Так сфармулявана рашэнне гарвыканкама № 881 «Аб парадку правядзення масавых мерапрыемстваў у г. Віцебску»: спачатку дамовы на абслугоўванне, інакш пра дазвол не будзе і гаворкі. Усё гэта я падрабязна напісаў у Міністэрства ўнутраных спраў. Маўляў, віцебскія міліцыянты парушаюць рашэнне гарвыканкама. А ў адказ прыходзяць 5 прапаноў: «Не, міліцыянты зрабілі ўсё правільна, парушэнняў заканадаўства няма», - паведаміў актывіст.

Ён разам з Аляксеем Гаўруцікавым, аднапартыйцам палітвязня Мікалая Статкевіча, ужо судзіўся з першай гарадской паліклінікай за адмову ад супрацоўніцтва. Галоўны лекар таксама не стаў заключаць дамову з актывістамі, а Кастрычніцкі райсуд вырашыў, што і тут усё правільна - што ўстановы самі вырашаюць, жадаюць яны заключаць дамовы на абслугоўванне, ці не.

Такім чынам, і суд, і Міністэрства ўнутраных спраў ускосна пацвердзілі, што патрабаванняў гарвыканкама актывістам не выканаць ніколі. І іх права на публічнае выказванне сваёй грамадзянскай пазіцыі так і застанецца нерэалізаваным.