28 сакавiка 2024, Чацвер, 17:50
Падтрымайце
сайт
Сім сім,
Хартыя 97!
Рубрыкі

Магілёўцы патрабуюць вярнуць вуліцам гістарычныя назвы

33
Магілёўцы патрабуюць вярнуць вуліцам гістарычныя назвы

Жыхары горада мяркуюць, што працу тапанімічнай камісіі пры Магілёўскім гарвыканкаме для вяртання вуліцам гістарычных назваў трэба актывізаваць.

Да такой высновы прыйшла большасць удзельнікаў ток-шоў у пытаннях гарадской тапанімікі, якое прайшло 29 сакавіка ў будынку магілёўскага «Тэхнапарка», паведамляе БелаПАН.

Запрошаныя ў якасці экспэртаў чальцы тапанімічнай камісіі - выкладчыкі Ігар Пушкін, Леанід Сугака і старшы навуковы супрацоўнік Магілёўскага абласнога краязнаўчага музея Вольга Чарняўская - адзначалі, што камісія працуе вельмі павольна ў плане прапаноў вяртання вуліцам цэнтра места гістарычных назваў. Разам з тым, з іхных слоў, гарадскія чыноўнікі не ўважаюць гэтую працу за прыярытэтную і часта не прыслухоўваюцца да рэкамендацый камісіі, якая з'яўляецца дарадчым органам.

У той жа час вяртанне ў гарадскую тапаніміку назваў Пажарны завулак і вуліца Спаская, а таксама дубляванне назвы Ленінская гістарычнай назвай Вялікая Садовая трэба разглядаць як пачатак вялікай працы, якую варта актывізаваць, заявіла Чарняўская.

Выступаючы на ток-шоў, прадстаўнікі ветэранаў казалі пра тое, што цяперашнія назвы і помнікі - гэта гісторыя, з якой нельга вольна абыходзіцца. Прадстаўнікі маладзейшага пакалення сцвярджалі, што назвы вуліц гістарычнага цэнтра места, якія носяць імёны дзеячаў бальшавіцкага руху, з'яўляюцца не столькі выяўленнем гісторыі, колькі бальшавіцкай прапагандай.

У Магілёве ёсць некалькі помнікаў Леніну - чалавеку, які ніколі не быў у горадзе. У той жа час у месце няма помнікаў выдатным дзеячам беларускай гісторыі і культуры. Усё гэта выстаўляе культурную сталіцу Беларусі і СНД 2013 непрывабным постсавецкім горадам, які нібыта не мае багатай і самабытнай гісторыі, казалі прыхільнікі вяртання месту тапанімічнай унікальнасці.

Падагульняючы вынік ток-шоў, гісторык Аляксандр Агееў заявіў, што падчас дыскусіі адбылося збліжэнне пазіцый прадстаўнікоў розных поглядаў і пакаленняў, а большасць выступаў аб'ядноўвала жаданне паскорыць працу тапанімічнай камісіі для вяртання вуліцам цэнтра Магілёва гістарычных назваў.

Арганізатарам ток-шоў «Магілёўская тапаніміка: павольны прагрэс у рамках закона?» выступіла грамадска-культурніцкая кампанія «Будзьма беларусамі».

Напісаць каментар 33

Таксама сачыце за акаўнтамі Charter97.org у сацыяльных сетках