Cosmo пра Беларусь: «А бібліятэка і праўда выродлівая»

Журналісты гламурнага часопіса падзяліліся сваімі ўражаннямі пасля паездкі ў Менск і Брэст.

Сутнасць матэрыялу простая: дзве дзяўчыны-журналісткі і мужчына-фатограф падарожнічаюць па Еўропе з 200 еўра ў кішэні і пішуць па хадзе свае дзённікі, піша «Комсомольская правда в Беларуси».

Першы пункт на мапе - Менск, праз яго масквічы едуць пакараць Еўропу. Уражанні ў журналістак яшчэ тыя. Вось пра цэнтр беларускай сталіцы: «Навігатар прывёў нас у цэнтр. Але там былі адны казіно, і людзі, якія выходзілі з іх, выглядалі не вельмі прыязна»Нарэшце дзяўчаты сустрэлі двух маладых людзей і папрасілі паказаць горад. Беларусы і паказалі.

«Асабліва запомніўся ўсім узрушаюча прыгожы «Востраў слёз» - мемарыяльны комплекс у лукавіне ракі Свіслач. А яшчэ «самы выродлівы будынак Еўропы» (па словах павадыроў) - Цэнтральная бібліятэка», - пішуць журналісткі. І ў пацверджанне іх слоў рэдакцыя размяшчае на наступнай старонцы фота нашага «алмаза» з адназначнай подпісам: «А бібліятэка і праўда выродлівая».

Далейшыя ўражанні абсалютна банальныя: начавалі ў вёсцы ў незнаёмых людзей, елі бульбу ў мундзірах, дзівіліся добразычлівасці беларусаў. Патрапіўшы ў Брэсцкую крэпасць, адчулі сябе няўтульна: маўляў, сорамна, што нічога не ведаюць пра герояў.

«Стала ясна, што ў Брэсце рабіць няма чаго - людзей на вуліцах няма, а ў кватэру пастукацца на начлег не так проста, як у вясковы дом. Спробы злавіць Wi-Fi таксама праваліліся!» - сумна паведамілі гламурныя дзяўчыны... І паехалі далей, у Польшчу.