Звольненая намеснік старшыні «Беллегпрама»
21- 1.04.2013, 11:06
Саўмін правёў кадравыя перастаноўкі ў дзяржканцэрне «Беллегпрам».
Згодна з пастановай Савета Міністраў Рэспублікі Беларусь № 218 ад 28 сакавіка 2013 года, намеснік старшыні Беларускага дзяржаўнага канцэрна па вытворчасці і рэалізацыі тавараў лёгкай прамысловасці Людміла Цяглава вызваленая ад пасады па пагадненні бакоў.
Урад таксама зацвердзіў двух новых намеснікаў старшынь «Беллегпрама». Імі сталі былы начальнік упраўлення каардынацыі развіцця гарбарна-абутковай галіны Вячаслаў Мірусін і Таццяна Старчанка, якая раней займала пасаду намесніка міністра эканомікі Беларусі.
Нагадаем, у снежні 2012 пасля наведвання прадпрыемства «Камволь» беларускі кіраўнік звольніў кіраўніка канцэрна «Беллегпрам» Генадзя Вырко і яго намесніка Андрэя Мытніка.
«Тое, што я тут убачыў, - гэта злачынная безадказнасць, - заявіў тады Аляксандр Лукашэнка. - Ну як жа так: пабітае шкло і жанчыны працуюць?! Тут і Ладуцька хадзіў, і Сямашка, і Мясніковіч. Гэта злачынства! І яно караецца».
Фота: ctv.by