Арцыбіскуп Кандрусевіч падараваў Лукашэнку Евангелле
22- 1.04.2013, 13:26
Беларускі кіраўнік сустрэўся ў панядзелак з мітрапалітам Менска-Магілёўскім арцыбіскупам Тадэвушам Кандрусевічам.
Падчас сустрэчы Аляксандр Лукашэнка адзначыў «важнае значэнне і вялікі ўплыў Рымска-каталіцкай царквы ў Беларусі».
«Гэты год асаблівы, нядаўна абралі новага кіраўніка Рымска-каталіцкай царквы. Важна, што сёння адбываецца ў каталіцкай царкве, бо не сакрэт, што ў Беларусі Рымска-каталіцкая царква мае вялікае значэнне і яе ўплыў у нашым грамадстве вялікі», - заявіў Лукашэнка ў панядзелак падчас сустрэчы з мітрапалітам ў Архікафедральным саборы імя Найсвяцейшай Панны Марыі, піша «Інтэрфакс».
У пачатку размовы Лукашэнка павіншаваў Кандрусевіча, святароў РКЦ у Беларусі, вернікаў каталікоў.
«Гэта тычыцца і пратэстантаў, гэта нашы людзі», - сказаў Лукашэнка.
Мітрапаліт Кандрусевіч паднёс кіраўніку краіны Евангелле, упершыню выдадзенае на беларускай мове.
У сваю чаргу Лукашэнка паднёс у дар Рымска-каталіцкай царкве велікоднае яйка з дрэва ва ўнікальнай тэхніцы Сожская скань. Падстава яйка адлюстроўвае Галгофу, усярэдзіне сферы размешчаны мініятурны крыж з распяццем. Па баках - два разныя медальёны з выявай Дзевы Марыі і Ісуса Хрыста. Вянчае яйка фігура Хрыста.