Дзіўная смерць бацькі гродзенскага прафесара

Следства ўзбудзіла крымінальную справу па факце ДТЗ, у выніку якога загінуў 86-гадовы бацька гродзенскага прафесара Алеся Астроўскага.

«Па факце ДТЗ, у выніку якога атрымаў смяротныя траўмы жыхар Гродна 1927 года нараджэння, распачатая крымінальная справа па ч. 2 арт. 317 (парушэнне правілаў дарожнага руху, што пацягнула па неасцярожнасці смерць чалавека)», - паведамілі агенцтву «Інтэрфакс-Захад» у панядзелак ва ўпраўленні Следчага камітэта па Гродзенскай вобласці.

«У якасці падазраванага па дадзенай крымінальнай справе праходзіць кіроўца аўтамабіля, жыхар Гродна 1971 года нараджэння», - удакладнілі ва УСК.

Там таксама праінфармавалі, што, па папярэдняй інфармацыі, ДТЗ адбылося на тэрыторыі гаражнага кааператыва. «Пажылы мужчына знаходзіўся каля гаража, калі на яго наехаў аўтамабіль. Кіроўца даставіў мужчыну ў бальніцу, дзе ён памёр ад атрыманых траўмаў», - распавялі ва ўпраўленні.

Следства працягваецца, следчыя высвятляюць падрабязнасці ДТЗ.

Аднак сайт udf.by мае іншую версію таго, што здарылася. Як адзначаецца на партале, бацька прафесара медыцыны быў забіты невядомымі ва ўласным гаражы 25 сакавіка.

У 80-гадовага мужчыны былі зламаныя тры рэбры, нос, парваная плеўра. Жорстка збіты мужчына памёр у бальніцы.

Забойства адбылося днём, калі пажылы мужчына пайшоў у гараж узяць буракі. Суседзі па гаражах, з кім пасля трагічнай смерці бацькі размаўляў Алесь Астроўскі, запалоханыя і не жадаюць размаўляць. Сведкі ёсць, але баяцца казаць.

Следства ўпарта прытрымліваецца бытавой версіі трагедыі. Няма прыкмет рабавання, так як усе грошы (80 000 рублёў) і маёмасць гаража злачынцы не кранулі. Аднак каму перашкаджаў пажылы чалавек, якому было ўжо за 80?

Прафесар Алесь Астроўскі выкладае на факультэце медыцынскай біялогіі і генетыкі Гродзенскага медуніверсітэта, вядомы сваімі дэмакратычнымі поглядамі, неаднаразова ўдзельнічаў у акцыях апазіцыі.

Фотa: ria.ru