КНДР патрабуе прызнання ў якасці ядзернай дзяржавы

Пхеньян адхіляе патрабаванні Паўднёвай Карэі і ЗША аб згортванні сваёй ядзернай праграмы і настойвае на прызнанні КНДР ядзернай дзяржавай.

Пра гэта піша ў аўторак цэнтральная паўночнакарэйская газета «Надон сінмун», перадае «Інтэрфакс».

«Калі КНДР сядзе за стол перамоваў з ЗША, гэта павінен быць дыялог паміж ядзернымі дзяржавамі, а не прымус да ядзернага раззбраення аднаго з бакоў», - адзначаецца ў паведамленні.

Раней прэзідэнт ЗША Барак Абама заявіў, што ў Паўночнай Карэі па-ранейшаму ёсць магчымасць для перамоваў з Паўднёвай Карэяй і ЗША, аднак для дыялогу Пхеньян павінен адмовіцца ад сваіх «правакацыйных паводзінаў».

Дзяржсакратар ЗША Джон Кэры, у сваю чаргу, заявіў, што гатовы да кантактаў з Паўночнай Карэяй пры ўмове, што яна распачне крокі па адмове ад ядзернай зброі.

«Мы гатовыя да кантактаў, аднак нам патрэбны зручны момант, прыдатныя ўмовы», - сказаў ён падчас візіту ў Токіо і дадаў, што Паўночная Карэя павінна зрабіць крокі да згортвання сваёй ядзернай праграмы.

Паўночнакарэйскія ўлады, са свайго боку, назвалі галоўнай умовай для аднаўлення мірнага дыялогу адмену санкцый Рады бяспекі ААН у дачыненні да КНДР.

У пачатку месяца КНДР ужо размясціла на ўсходнім узбярэжжы сем пускавых установак і дзве балістычныя ракеты сярэдняй далёкасці «Мусудан», а таксама парэкамендавала замежным дыпламатам пакінуць краіну. Гэта стала падставай для турботы з боку Сеула, які выказаў здагадку, што Паўночная Карэя мае намер адзначыць дзяржаўнае свята запускам ракеты. Аднак святкаванне прайшло мірна.

У той жа час паўднёвакарэйскія актывісты ў той дзень дэманстратыўна спалілі партрэты Кім Ір Сена, Кім Чэн Іра і цяперашняга кіраўніка КНДР Кім Чэн Ына, што прывяло да рэзкай рэакцыі Пхеньяна, які прыгразіў у выпадку паўтарэння падобных інцыдэнтаў атакаваць суседзяў без папярэджання.

У лютым 2013 года КНДР правяла чарговыя ядзерныя выпрабаванні, што прывяло да абвастрэння сітуацыі на паўвостраве. У адказ на рашэнне ААН зрабіць больш жорсткімі санкцыі ў дачыненні да Пхеньяна мясцовыя ўлады прыгразілі ядзерным ударам па ЗША і Паўднёвай Карэі, адключылі лінію экстранай сувязі з Сеулам і разарвалі з ім пакт аб ненападзе. У сваю чаргу ЗША накіравалі ў на вучэнні ў Паўднёвую Карэю стратэгічныя бамбавікі.