Румас прызначаны віцэ-прэм'ерам «у інтэграцыйных пытаннях»
21- 25.04.2013, 19:04
У складзе ўрада Беларусі з'явіўся новы-стары віцэ-прэм'ер Сяргей Румас.
Стары - бо Румас, які цяпер кіруе Банкам развіцця, ужо займаў пасаду віцэ-прэм'ера РБ. Новы - бо пад Румаса ўказам Лукашэнкі створаная новая віцэ-прэм’ерская пасада, паведамляе АФН.
Згодна з дакумэнтам Румасу нададзеныя паўнамоцтвы віцэ-прэм'ера РБ у пытаннях дзейнасці Беларусі ў рамках «саюзнай дзяржавы», Мытнага саюза і Адзінай эканамічнай прасторы, Садружнасці Незалежных Дзяржаў, Еўразійскай эканамічнай супольнасці, а таксама фармавання Еўразійскага эканамічнага саюза.
Акрамя таго, Румасу нададзеныя паўнамоцтвы прадстаўніка Беларусі ў Радзе Еўразійскай эканамічнай камісіі (гэтую пасаду Лукашэнка так і не рызыкнуў перадаваць Пракаповічу ці Сямашку).
Румас таксама ўключаны ў склад Савета Міністраў і Прэзідыума Савета Міністраў РБ.