Непаўналетняга брэстчаніна аштрафавалі за нацыянальны сцяг
8- 4.04.2013, 15:55
Уладзіслава Бароўскага абвінавацілі ў правядзенні несанкцыянаванага пікету.
Пра гэта сайту charter97.org распавёў брэсцкі праваабаронца Раман Кісляк. Уся «віна» актывіста заключалася ў тым, што 18 сакавіка ён вывесіў бел-чырвона-белы сцяг на ўстаноўленым на пастаменце бронетранспарцёры каля Парку воінаў-інтэрнацыяналістаў.
Улічваючы, што на той момант Уладзіславу Бароўскаму было 17 гадоў, яго справу разгледзела камісія па справах непаўналетніх адміністрацыі Маскоўскага раёна Брэста пад старшынствам Н. Зайцавай. Актывіста прызналі вінаватым у парушэнні артыкула 23.34 КаАП і аштрафавалі на 50 тысяч рублёў.
Раней суд Маскоўскага раёна Брэста таксама за вывешванне нацыянальнага сцяга аштрафаваў сяброў аргкамітэта па стварэнні партыі «Беларуская хрысціянская дэмакратыя» Яўгена Хазіахметава і Андрэя Шарэнду.