КНДР прапануе эвакуяваць дыпламатаў з Пхеньяна
45- 5.04.2013, 15:06
Улады Паўночнай Карэі прапанавалі супрацоўнікам расейскай амбасады і іншых дыпламатычных місій разгледзець пытанне аб эвакуацыі з краіны ў сувязі з абвастрэннем сітуацыі на Карэйскім паўвостраве.
Пра гэта распавёў прэс-аташэ амбасады Расеі ў Пхеньяне Дзяніс Самсонаў, паведамляе ВВС.
«Расейскі бок прыняў гэтую прапанову да ведама, і пакуль мы знаходзімся ў стане прыняцця рашэння», - сказаў ён.
Паўднёвая Карэя вывела ў моры два ракетных эсмінца, аснашчаных сістэмамі супрацьракетнай абароны, у адказ на размяшчэнне ракетных установак КНДР на сваім усходнім узбярэжжы.
Нагадаем, 30 сакавіка ўлады КНДР абвясцілі, што ўступаюць у «стан вайны» з Паўднёвай Карэяй. У заяве, распаўсюджанай ва ўсіх дзяржаўных органах і ўстановах КНДР, гаварылася, што з гэтага часу «ўсе пытанні паміж двума Карэямі будуць вырашацца згодна з умовамі ваеннага часу».
Фота: AP