Vinsent: Беларусь нельга пускаць на «Еўрабачанне»

Прадстаўнікоў Беларусі нельга пускаць на «Еўрабачанне», таму што артысты выбіраюцца несумленным галасаваннем.

Так музыка Vinsent (Зміцер Папко) пракаментаваў сайту charter97.org патрабаванні шведскіх праваабаронцаў выключыць Беларусь з Еўрапейскага вяшчальнага саюза і не пускаць на «Еўрабачанне».

«Я лічу, што гэта даволі цяжка ажыццявіць. Сітуацыя досыць супярэчлівая. З аднаго боку, трэба забараніць прадстаўнікам ад Беларусі ўдзельнічаць у конкурсе, таму што артысты, якія едуць на «Еўрабачанне», выбіраюцца несумленным галасаваннем», - падкрэсліў рэпер.

Пры гэтым ён адзначыў, што з іншага боку, якая-небудзь маленькая дзяўчынка з Драгічына, магчыма, будзе плакаць з гэтай прычыны.

«Таму, улічваючы маленькіх дзяўчынак з Крычава ці Узды, а таксама хатніх гаспадынь з Клімавіч, якім цікавае дадзенае мерапрыемства, я б не казаў адназначна (смяецца). Я лічу, што трэба правесці шырокую дыскусію на гэтую тэму», - дадаў музыка.

Ён таксама паведаміў, што не глядзіць конкурс «Еўрабачанне».

«Асабіста я ад Беларусі на гэтае мерапрыемства адпраўляў бы якіх-небудзь клоунаў. Заўважце, што цывілізаваныя краіны заўсёды пасылаюць на «Еўрабачанне» фрыкаў. На самай справе, тая ж Велікабрытанія мае магчымасць перамагаць на ім кожны хоць год, адпраўляючы туды Адэль, Робі Уільямса, Стынга і гэтак далей. Але выбірае «слабых» выканаўцаў, усім сваім выглядам паказваючы, што гэта нязначны конкурс. Я б назваў яго «сцёбным», а беларускія ўлады расцэньваюць гэтую падзею як спартыўнае спаборніцтва, на якім трэба перамагаць, і ў выніку не выйграюць, таму што вельмі сур'ёзна да гэтага падыходзяць», - упэўнены Vinsent.

Нагадаем, шведскія праваабаронцы патрабуюць выключыць Беларусь з Еўрапейскага вяшчальнага саюза і не пускаць на «Еўрабачанне».

Конкурс «Еўрабачанне-2013» пройдзе 14-18 траўня ў шведскім горадзе Мальме. У гэтым годзе Беларусь збіраецца прадстаўляць спявачка Алена Ланская з песняй «Solayoh». Спявачка ўжо прымала ўдзел у нацыянальным адборачным конкурсе на міжнародны музычны фестываль у мінулым годзе і нават была абвешчаная яго пераможцай. Аднак праз некаторы час вынікі былі перагледжаныя, і на «Еўрабачанне» ў Баку паехаў гурт «Litesound».