Польшча і Харватыя падтрымалі пашырэнне ЕЗ на ўсход

Прэзідэнт Польшчы Браніслаў Камароўскі выказаў перакананне, што нягледзячы на крызіс зоны еўра ЕЗ будзе і ў далейшым паспяхова развівацца.

Польскі лідар спадзяецца, што Харватыя, якая з 1 ліпеня стане паўнапраўным членам ЕЗ, будзе падтрымліваць Украіну на шляху еўраінтэграцыі. Пра гэта кіраўнік польскай дзяржавы заявіў на сумеснай прэс-канферэнцыі з прэзідэнтам Харватыі Іва Ёсіпавічам, перадае Polskie Radio.

У другі дзень візіту ў Харватыю прэзідэнт Камароўскі разам са сваім харвацкім візаві прыме ўдзел у адкрыцці эканамічнага форуму, а таксама сустрэнецца з прадстаўнікамі польскай дыяспары. У панядзелак Браніслаў Камароўскі з Іва Ёсіпавічам правялі палітычныя перамовы, дамінуючай тэмай якіх сталі еўрапейскія пытанні. «Польшча разлічвае на тое, што Харватыя будзе падтрымліваць ідэю пашырэння Еўразвяза на ўсход, гэтак жа як і Польшча падтрымлівае пашырэнне ЕЗ на краіны былой Югаславіі» - адзначыў прэзідэнт Польшчы.

У студзені жыхары Харватыі на рэферэндуме па пытанні аб уступленні ў Еўрапейскі звяз прагаласавалі за далучэнне да гэтай арганізацыі ў 2013 годзе.

9 снежня 2011 года была падпісаная дамова аб уступленні краіны ў склад ЕЗ. Еўрапейскі парламент на пленарным пасяджэнні 1 снежня 2011г. ухваліў уступленне Харватыі ў Еўразвяз. За адпаведнае рашэнне прагаласавалі 564 дэпутата, супраць выступілі 38, 32 устрымаліся. Дамова павінна быць ратыфікаваная ўсімі 27 дзяржавамі - членамі Еўразвяза.