У Азербайджане будуць саджаць за «паклёп» у Інтэрнэце

Дэпутаты парламента Азербайджана прыраўнялі пакаранне за паклёп і абразу ў Інтэрнэце да падобных дзеянняў у СМІ.

Па словах старшыні Камітэта па прававой палітыцы і дзяржаўным будаўніцтве Алі Гусэйнлі, дэпутаты палічылі, што паклёп і абразы ў Інтэрнэце павінны карацца гэтак жа, як і паклёп і абразы ў СМІ. Таксама дэпутаты дыскутавалі з нагоды закона «Аб дыфамацыі», піша партал Bakililar.az.

Адзначым, што ў артыкулах 147.1 (паклёп) і 148 (абраза) Крымінальнага Кодэкса фармулёўкі «ў сродках масавай інфармацыі» заменяць на словы «ў сродках масавай інфармацыі, альбо Інтэрнэт-рэсурсе ў выпадку яго публічнай дэманстрацыі».

Падобныя законы ўжо дзейнічаюць у некаторых краінах СНД, у тым ліку і ў Беларусі.

Згодна з артыкулам 147, паклёп, гэта значыць распаўсюджванне заведама звестак, якія ганьбяць гонар і годнасць іншай асобы або, якія падрываюць яе рэпутацыю ў публічным выступленні, творы, які дэманструецца публічна, або сродках масавай інфармацыі караецца штрафам у памеры ад 100 да 500 манатаў, або грамадскімі працамі на тэрмін да 240 гадзін, або папраўчымі работамі на тэрмін да 1 года, або пазбаўленнем волі на тэрмін да 6 месяцаў.

У цяжкіх выпадках паклёп, спалучаны з абвінавачваннем асобы ў здзяйсненні цяжкага ці асабліва цяжкага злачынства, караецца папраўчымі работамі на тэрмін да двух гадоў, або абмежаваннем волі на тэрмін да двух гадоў, або пазбаўленнем волі на тэрмін да трох гадоў.

У сваю чаргу артыкул 148 прадугледжвае пакаранне ў выглядзе штрафу ў памеры ад 300 да 1000 манатаў, або грамадскіх работ на тэрмін да 240 гадзін, або папраўчых работ на тэрмін да 1 года, або пазбаўлення волі на тэрмін да 6 месяцаў.