Самалёт кампаніі US Airways прызямліўся на чэрава (Відэа)
8- 19.05.2013, 16:23
Пасажырскі лайнэр амэрыканскай авіякампаніі US Airways зрабіў экстранную пасадку ў міжнародным аэрапорце «Ньюарк Лібэрці» на ўсходзе ЗША.
Пра гэта паведаміў у суботу AP прадстаўнік авіякампаніі Дэўен Андэрсан.
З ягоных слоў, на борце турбапрапэлернага самалёта знаходзіліся 31 пасажыр і тры чальцы экіпажу.
Пілот не здолеў выпусціць шасі, і самалёт сеў на чэрава. Папярэдне пажарныя службы нанеслі пену на пасадкавую паласу. Са слоў Андэрсана, корпус самалёта «бліскаў, але не загарэўся». У выніку інцыдэнту ніхто не пацярпеў.
Лайнэр вылецеў з Філадэльфіі. Калі самалёт наблізіўся да аэрапорта «Ньюарк Лібэрці», пілот выявіў няспраўнасць у шасі. Ён зрабіў некалькі колаў над Ньюаркам, аднак так і не змог выпусціць шасі. У выніку ён наважыў пасадзіць лайнэр на фюзеляж.
Пасля прызямлення пасажыры былі эвакуяваныя ў тэрмінал аэрапорта.
Спецыялісты з Нацыянальнага дэпартамэнта бяспекі на транспарце расследуюць абставіны інцыдэнту.