Следства па справе Данькова падоўжанае на тры месяцы

Тэрміны расследавання крымінальнай справы ў дачыненні да гаспадара менскага забаўляльнага цэнтра Dankoff Club падоўжаныя яшчэ на 3 месяцы.

«У сувязі з выяўленымі ў ходзе следства новымі важнымі абставінамі, а таксама значна ўзрослым аб'ёмам матэрыялаў крымінальнай справы, якія патрабуюць уважлівага вывучэння, УСК па Менску тэрміны расследавання дадзенай крымінальнай справы прадоўжаныя да 22 жніўня 2013 года», - паведаміў агенцтву «Інтэрфакс-Захад» у аўторак афіцыйны прадстаўнік УСК па Менску Аляксандр Герасімаў.

Нагадаем, Юрый Данькоў быў затрыманы 4 верасня 2012 года. У гэты дзень у Dankoff Club правялі ператрус і іншыя следчыя дзеянні ў межах крымінальнай справы, узбуджанай у канцы жніўня Следчым камітэтам у дачыненні да мастацкага кіраўніка і адміністратара ТАА Dankoff Club. Яны падазраюцца ў тым, што з 2006 года падавалі памяшканні ў клубе для заняткаў прастытуцыяй. Дзеянні службовых асоб кваліфікаваныя па ч. 2 арт. 171 КК. Мастацкі кіраўнік Dankoff Club затрыманы.

7 верасня Юрыю Данькову было прад'яўленае абвінавачванне ў здзяйсненні злачынства, прадугледжанага ч. 2 арт. 171 КК (выкарыстанне заняткаў прастытуцыяй або стварэнне ўмоў для заняткаў прастытуцыяй, учыненыя службовай асобай з выкарыстаннем сваіх службовых паўнамоцтваў).