Беларуска-кітайскія Geely купілі 30 чалавек

Тым часам кошт завода па іх вырабе вырас. Яго будаўніцтва абыдзецца ў больш, чым $250 мільёнаў.

Пра гэта паведаміў сёння карэспандэнту БелТА дырэктар СЗАТ «БелДжы» Зміцер Батракоў.

Першапачаткова меркавалася, што будаўніцтва завода абыйдзецца ў $245 млн. Аднак кошт праекта будзе перагледжаны, паколькі для вытворчасці аўтамабіляў плануецца выкарыстоўваць больш дасканалую тэхналогію, патлумачыў дырэктар.

Завод па вытворчасці беларуска-кітайскіх аўтамабіляў Geely плануецца пабудаваць да канца 2015 года.

Аўтамабілі, што зараз вырабляюць у Барысаве, пачнуць прадаваць у Расеі. Пра гэта паведаміў сёння журналістам начальнік аддзела продажаў і сэрвісу СЗАТ «БелДжы» Аляксей Крычмар.

Ён таксама сказаў, што ў Беларусі ў цяперашні час прайшла выпрабаванне і запушчаная ў рознічную сетку продажаў мадэль SC7. Яе кошт для канчатковага пакупніка складае каля $13 тыс. Ужо прададзена каля 30 аўтамабіляў, пакупнікамі выступілі прыватныя асобы. «Што тычыцца арганізацый, то яны пакуль толькі заключаюць дамовы аб намерах», - растлумачыў начальнік аддзела. Першая партыя легкавых аўтамабіляў беларуска-кітайскай зборкі, вырабленых на СЗАТ «БелДжы» ў Барысаве, паступіла ў продаж у сакавіку бягучага года.

Акрамя таго, кампанія сабрала некалькі красовераў EMGrand X7, якія праходзяць выпрабаванні для атрымання ўхвалы транспартнага тыпу. У бліжэйшы час гэтая мадэль стане даступная ў рознічнай сетцы продажаў. Кошт аўтамабіля пакуль не зацверджаны, мяркуецца, што ён будзе прадавацца ў дыяпазоне $19-23 тыс. Усяго пакупнікам прапануюць тры версіі красовера.

СЗАТ «БелДжы» створана 23 снежня 2011 года. Інвестыцыйная дамова з кітайскай кампаніяй Geely падпісаная ў сакавіку 2012 года. Прадпрыемства па зборцы кітайскіх аўтамабіляў размешчана на арэндаваных плошчах барысаўскага ААТ «Аўтагідраўзмацняльнік». Створаная вытворчасць з максімальнай магутнасцю па зборцы SKD-камплектаў (буйнавузлавая зборка) на 10 тыс. аўтамабіляў у год. На прадпрыемстве працуюць 57 чалавек. Заснавальнікамі СЗАТ «БелДжы» з'яўляюцца ААТ «БелАЗ» (50% акцый), кітайская кампанія Geely (32,5%) і сумеснае беларуска-кітайскае прадпрыемства па вытворчасці аўтакампанентаў «Саюзаўтатэхналогіі».