Генпракурор не заўважыў карупцыі ў Беларусі

Аляксандр Канюк лічыць, што Беларусь ніколі не ператворыцца ў цэнтр карупцыі.

Пра гэта ён паведаміў на пленарным пасяджэнні Еўразійскай групы па процідзеянні легалізацыі злачынных даходаў і фінансаванні тэрарызму.

«У 2012 годзе праваахоўнымі органамі было вернута ў бюджэт Беларусі звыш 28,6 млн даляраў», - адзначыў генеральны пракурор.

Ён падкрэсліў, у Беларусі створаная сістэма процідзеяння карупцыі і арганізацыйнай злачыннасці, а таксама дзейнічае каардынацыйная нарада, у якую ўваходзяць кіраўнікі фінансавай выведкі.

Пры гэтым ён выказаў меркаванне, што Беларусь ніколі не ператворыцца ў цэнтр фінансавага зла і карупцыі. Паводле яго слоў, у пару яго дзейнасці суддзёй даводзілася разглядаць шмат спраў, у тым ліку па легалізацыі злачынных даходаў. У Беларусі няма перадумоў для ператварэння яе ў афшорную зону. «У нас у Беларусі такога няма, і наўрад ці будзе, мы гэтага не дапусцім», - сказаў ён.

Адмыць грошы ў Беларусі спрабуюць такія ж камерцыйныя структуры, як і ва ўсім свеце. На пытанні журналістаў, у якой сферы часцей за ўсё адбываюцца фінансавыя махінацыі, Аляксандр Канюк сказаў, што ў цэлым немагчыма вызначыць тут нейкі прыярытэт. «Іх немагчыма неяк вызначыць, гэта нядобрасумленныя людзі, якія займаюцца бізнесам у розных сферах, у прыватнасці незаконны аўтабізнес», - адзначыў ён. У той жа час генеральны пракурор падкрэсліў, што праваахоўныя органы не дапусцяць залішняга фінансавага кантролю, каб такія дзеянні не паўплывалі на гаспадарчую дзейнасць адмоўна.

Старшыня Вярхоўнага Савета 12 склікання, генерал-лейтэнант міліцыі Мечыслаў Грыб не пагадзіўся з Аляксандрам Канюком, каментуючы яго заяву charter97.org.

«Хачу адзначыць, што пытанняў карупцыйнага характару ў Беларусі вельмі шмат. Нават кіраўніцтва высокага ўзроўню аказваецца за кратамі па абвінавачванні ў карупцыі. Я лічу, што на сённяшні дзень у Беларусі існуе «ценявая эканоміка». Гэта дзіця савецкай улады, якое стваралася, у тым ліку і для адмывання незаконна здабытых грошай. І словы пра тое, што мы ніколі гэтага не дапусцім, з'яўляюцца вельмі адважнай заявай. Вядома, на афіцыйным узроўні беларускія ўлады не будуць спрыяць стварэнню структур для адмывання грошай. Але факты гавораць самі за сябе. Узяць хаця б казіно і ігральныя ўстановы, якія з'яўляюцца прыкладам афіцыйнай легалізацыі злачынных даходаў», - упэўнены юрыст.

Гучныя карупцыйныя скандалы, у якіх фігуруюць высокапастаўленыя прадстаўнікі ўладаў, здараюцца ў Беларусі рэгулярна. Найбольш гучныя з іх - справы з удзелам старшыні Гомельскага гарвыканкама Віктара Піліпца, намесніка міністра ўнутраных спраў Беларусі Яўгена Палудня, начальніка галоўнага ўпраўлення ўласнай бяспекі МУС, падпалкоўніка міліцыі Уладзіміра Кротава. Таксама на карупцыйных злачынствах часта трапляюцца «дэпутаты» ўсіх узроўняў.