Эквадорскі сябар Лукашэнкі стаў прэзідэнтам у трэці раз
10- 25.05.2013, 11:10
У Кіта, сталіцы Эквадора, прайшла цэрымонія інаўгурацыі Рафаэля Карэа.
Клятву кіраўніка дзяржавы гэты палітык прамаўляе вось ужо трэці раз. Упершыню Рафаэль Карэа быў абраны ў 2007 годзе, перадае Euronews.
Лідар сацыялістаў паабяцаў працягнуць барацьбу з беднасцю і павялічыць прысутнасць дзяржавы ў эканоміцы.
Прыхільнікі Карэа ставяць яму ў заслугу палітычную стабілізацыю краіны і зніжэнне ўзроўню беднасці. Апаненты сцвярджаюць, што ў яго ёсць дыктатарскія схільнасці.
У палацы заканадаўчага сходу, дзе адбылася цэрымонія, прысутнічалі прадстаўнікі палітычнай эліты краіны і замежныя госці. Сярод іх прэзідэнты: Венесуэлы - Нікалас Мадура, Балівіі - Эва Маралес, Грузіі - Міхаіл Саакашвілі, а таксама спадчыннік іспанскага пасаду прынц Астурыйскі Феліпэ. Беларусь прадстаўляла дэлегацыя «палаты прадстаўнікоў» на чале з Уладзімірам Андрэйчанкам.
Нагадаем, Рафаэль Карэа быў пераабраны на вышэйшую пасаду ў дзяржаве ў лютым 2013 года.
Лукашэнка наведваў Эквадор у чэрвені мінулага года. У турнэ па краінах Лацінскай Амерыкі беларускі кіраўнік адправіўся на эксклюзіўным Boeing 767, які раней належаў Туркменбашы.
Фота: Reuters