Суд па «шпіёнскай» справе пачнецца 12 чэрвеня

Прызначаная дата суда па справе Андрэя Гайдукова.

Як паведамілі сваякі палітвязня Андрэя Гайдукова, разгляд справы адбудзецца 12 чэрвеня ў 10.00 у Віцебскім абласным судзе. Прызначаная суддзя - Галіна Урбановіч.

Учора старшыня КДБ Валерый Вакульчык заявіў, што паседжанне будзе праходзіць у закрытым рэжыме. Аднак афіцыйнага рашэння суда па гэтым пытанні пакуль няма, піша ПЦ «Вясна».

ПЦ «Вясна» і Беларускі Хельсінкскі камітэт выступілі з сумеснай заявай, у якой заклікаюць кампетэнтныя органы забяспечыць правядзенне адкрытага судовага разбору. Маці актывіста таксама настойвае на тым, каб судовы працэс быў адкрытым.

Нагадаем, матэрыялы крымінальнай справы ў дачыненні да Гайдукова паступілі ў Віцебскі абласны суд.

Паводле афіцыйнай інфармацыі, Андрэя Гайдукова затрымалі «падчас закладкі тайніка са звесткамі, якія цікавяць замежныя спецслужбы». Гэта абвінавачванне многія лічаць бессэнсоўным. Грамадзянская кампанія «Еўрапейская Беларусь» выступіла з заявай, у якім паведамлялася пра тое, што актывіста затрымалі за распаўсюджванне газеты «Хартыя'97».

Праваабаронцы пераслед Гайдукова звязваюць з яго апазіцыйнымі поглядамі і тлумачаць спробамі запалохаць моладзевых актывістаў.