Шуневічу і МУС даручылі «прывесці ў прытомнасць» будаўнікоў

Лукашэнка даручыў праваахоўным органам прааналізаваць сітуацыю ў прамысловасці і будаўніцтве.

Такую задачу кіраўнік паставіў перад міністрам унутраных спраў Ігарам Шуневічам пасля таго, як заслухаў яго даклад.

«Трэба падняць на паверхню цэлы пласт праблем, якія там існуюць. У дадзеным выпадку пачнем з будаўнічай галіны, паколькі мы нядаўна некаторыя пытанні абмяркоўвалі. Той узровень будаўніцтва, які існуе ў нашай краіне, абсалютна недапушчальны. Поўная расхлябанасць і разбоўтанасць, карумпаванасць. Я ўжо не адзін раз гэта казаў. Таму трэба ўвесь пласт праблем падняць на паверхню, прывесці ў прытомнасць будаўнічую галіну, асабліва чыноўнікаў, якія там занятыя, і прыняць адпаведныя меры. І прыкладна ў верасні мы выйдзем на фундаментальную нараду на ўзроўні прэзідэнта па абмеркаванні гэтых пытанняў», - сказаў беларускі кіраўнік.

Паводле слоў Лукашэнкі, неабходна таксама вывучыць сітуацыю ў камунальнай, сельскай гаспадарцы і іншых сферах.

«Без міліцыі гэтыя пласты мы не падымем. Таму хацелася, каб у камісіі, якая будзе створана, былі і вашы людзі, і ўся сістэма МУС папрацавала на тое, каб вывучыць і прыняць рашэнне па гэтых напрамках. Патрэбны сапраўды сур'ёзны аналіз сітуацыі», - падкрэсліў ён.

Ігар Шуневіч далажыў кіраўніку аб ходзе выканання даручэнняў па рэфармаванні сістэмы органаў унутраных спраў, а таксама аб бягучай аператыўнай абстаноўцы, стане з раскрывальнасцю злачынстваў.

Тыдзень таму Лукашэнка ўжо ўчыніў разнос работнікам будаўнічай галіны.

«Сёння зажраліся дашчэнту і закладваюць у праекты такія аб'ёмы, што фактычна будаўнікі нават не могуць столькі скрасці, пабудаваўшы дом па гэтых нормах, закладзеных у праекце», - падкрэсліў ён. Кіраўнік запатрабаваў устанавіць кошт жылля для маючых патрэбу ў памеры, якi не перавышае сярэдняй зарплаты, аднак эксперты ўпэўненыя, што гэта немагчыма з-за высокага ўзроўню карупцыі ў галіне.