Леанід Заіка: Экспарт упаў не з-за Мясніковіча, а з-за правілаў МС
69- 11.06.2013, 15:34
- 61,057
Беларускія прадпрыемствы, якія працуюць на склад, неканкурэнтназдольныя нават на прасторы Мытнага саюза.
Пра гэта ў інтэрв'ю сайту charter97.org заявіў эканаміст Леанід Заіка, каментуючы крытыку ў адрас прэм'ер-міністра, якая прагучала сёння.
«Адзіная памылка Міхаіла Мясніковіча, якога я ведаю дваццаць з лішнім гадоў, заключаецца ў тым, што ён ішоў да мары свайго юнацтва - хацеў быць прэм'ер-міністрам. На жаль, ён заняў гэтую пасаду ў той момант, калі ў беларускай эканоміцы нешта выпраўляць ужо стала немагчыма. Міхаіл Уладзіміравіч не вінаваты ў падзенні экспарту. У гэтым «вінаватыя» незалежныя эканамісты, такія як Заіка і Злотнікаў, якія ўвесь час казалі, што ўступленне Беларусі ў новую мытную прастору выявіць неэфектыўнасць 15-20% беларускіх прадпрыемстваў», - адзначыў эксперт.
Ён падкрэсліў, што экспарт прасеў на 20%, таму што на мытнай прасторы стала працаваць канкурэнцыя.
«Беларускую эканоміку ўжо пачалі «забіваць» макаронамі. Стандартная ўпакоўка расейскіх спагецці каштуе 3900 беларускіх рублёў, а нашы макароны каштуюць 6200 рублёў. І гэта толькі пачатак. У будучыні мы ўбачым на прылаўках крам больш таннае мяса. Расейская свініна будзе не па 80, а па 60 тысяч за кілаграм, будзе каўбаса, якая танней нашай адсоткаў на 20, будуць расейскія шыны і гэтак далей», - упэўнены эксперт.
Навуковец перакананы, што гэта з'яўляецца эфектам пачатку працы Мытнага саюза.
«Так, прайграюць вытворцы, асабліва тыя, якія працуюць дрэнна і забіваюць склады. Сапраўды таксама было ў Еўропе і Лацінскай Амерыцы: калі краіны аб'ядноўваюць свае эканомікі, то моцныя суб'екты гаспадарання пачынаюць развівацца лепш, а слабыя сыходзяць з дыстанцыі. Таму я хачу падтрымаць Міхаіла Уладзіміравіча і сказаць, што менавіта дзякуючы таму, што наша краіна пачала працаваць у МС, беларусы атрымліваюць і будуць атрымліваць больш танныя тавары і прадукты харчавання. А калі хто-небудзь думае, што гэта дрэнна і за гэта трэба караць прэм'ер-міністра, то такі чалавек думае не пра народ, а пра прадпрыемствы, якія не хочуць ці не ўмеюць працаваць», - падсумаваў Леанід Заіка.
Нагадаем, сёння беларускі кіраўнік папярэдзіў Міхаіла Мясніковіча аб «сацыяльнай напружанасці» з-за падзення экспарту.
Лукашэнка заявіў, што не прымае пазіцыю ўрада, які лічыць асноўнай прычынай зніжэння аб'ёмаў продажаў уступленне Расеі ў СГА.