НЗ у метро: цягнік, які зламаўся, выцягвалі з тунэлю
41- 3.06.2013, 13:27
- 86,514
Рух цягнікоў на Аўтазаводскай лініі Менскага метрапалітэна быў спынены на паўгадзіны.
Па невядомых пакуль прычынах каля 12.30 адбылася затрымка складаў, піша «Інтэрфакс».
У сацыяльных сетках распаўсюдзілася інфармацыя аб цягніку, які нібы сышоў з рэек, аднак афіцыйнага каментара, які пацвярджае альбо абвяргае аварыю, у цяперашні час няма. У прыватнасці, у МНС ніякіх званкоў аб надзвычайнай сітуацыі не паступала, паведаміў памочнік начальніка Менскага гарадскога ўпраўлення МНС Віталь Дэмбоўскі.
Паводле папярэдняй інфармацыі, прычынай затрымкі руху цягнікоў стала паломка складу.
Пра гэта паведамілі ў аператыўнай службе Менскага метрапалітэна
«Давялося выклікаць другі склад і выцягваць цягнік з тунэлю», - растлумачылі ў метрапалітэне. Іншыя падрабязнасці супрацоўнікі метрапалітэна паведаміць адмовіліся.