Чэкавую прыватызацыю падоўжылі да 2016 года

Чэкавая прыватызацыя падаўжаецца ў Беларусі яшчэ на тры гады - з 1 ліпеня 2013 года да 30 чэрвеня 2016 года.

Гэта рашэнне было прынята пастановай Савета Міністраў № 1111 ад 3 снежня 2012 года ў адпаведнасці з законам ад 6 ліпеня 1993 года «Аб iмянных прыватызацыйных чэках Рэспублiкi Беларусь», паведамляе БелТА.

У апошні раз тэрмін абарачэння імянных прыватызацыйных чэкаў «Маёмасць» быў падоўжаны ў 2010 годзе і скончыўся 30 чэрвеня 2013 года. Да гэтага чэкавая прыватызацыя таксама пастаянна падаўжалася. Выдача чэкаў «Маёмасць» пачалася ў Беларусі ў красавіку 1994 года.

Паводле дадзеных Дзяржкаммаёмасці, у гэтым годзе абмен чэкаў на акцыі прадпрыемстваў актывізаваўся. З пачатку 2013 года на акцыі абменена прыкладна 600 тыс. імянных прыватызацыйных чэкаў «Маёмасць», у той час як у ранейшыя гады іх абменьвалася за год прыкладна не больш чым па 500 тыс., у лепшыя гады чэкавай прыватызацыі абменьвалася максімум 1,5 млн чэкаў .

Гэтая актыўнасць звязаная з наяўнасцю пакупнікоў на акцыі. Людзі абменьваюць свае чэкі на акцыі, а затым прадаюць іх на Беларускай валютна-фондавай біржы, дзе гандлююць прафудзельнікі рынку каштоўных папер. Грамадзяне, якія хочуць там прадаць свае акцыі і атрымаць ад іх даход, заключаюць дамовы камісіі з прафудзельнікамі, і тыя выстаўляюць акцыі на біржу.

У цяперашні час у Беларусі на руках грамадзян знаходзіцца 170 млн чэкаў «Маёмасць». Людзі могуць абмяняць іх на акцыі прадпрыемстваў, пералік якіх ёсць у кожным аддзяленні ААТ «АСБ Беларусбанк». У адпаведнасці з новым законам аб прыватызацыі ўжо не падлягаюць абмену на чэкі «Маёмасць» акцыі прадпрыемстваў, якія створаныя і ствараюцца пасля 1 студзеня 2011 года.