Культурныя «чысткі» Пуціна

Крэмль рашуча настроены на абмежаванне свабоды і самастойнасці расейскай навукі і культуры.

Пра гэта піша Нікола Ламбардоцці ў артыкуле, апублікаваным у газеце La Repubblica.

«Крэмль сказаў: «Даволі». Занадта шмат скандалаў, прыдворных чутак вакол аднаго з самых знакамітых тэатраў у свеце. Пасля 12 гадоў абсалютнага і безумоўнага праўлення Анатоль Іксанаў, дырэктар Вялікага тэатра, быў звольнены і прызначаны на нейкую новую пасаду. Верагодней усяго, апошняй кропляй стаў гучны сыход зоркі сусветнага балета Святланы Захаравай, якая пакінула тэатр напярэдадні прэм'еры «Яўгенія Анегіна», гэтак чаканай маскоўскай публікай», - піша аўтар артыкула.

Нешматлікія заявілі пра салідарнасць з Іксанавым, прымаючы пад увагу, што пры ім рэпутацыі Вялікага быў нанесены сур'ёзны ўрон: гаворка ідзе пра крадзяжы ў працэсе вельмі дарагіх рэстаўрацыйных работ, пра замах на мастацкага кіраўніка балета і пра выкрыцці, звязаныя з перакупшчыкамі квіткоў, кастынгавай мафіяй і прыцягненнем многіх балерын да ажыццяўлення эскорт-паслуг, піша карэспандэнт.

Аднак справа ў тым, што рашэнне аб навядзенні парадку было прынятае непасрэдна прэзідэнтам. Аперацыя «Вялікі» з'яўляецца часткай толькі што пачатага наступлення па рэфармаванні расейскай культуры. Ліквідаваць трохі карупцыі, падправіць імідж, але, адначасова з гэтым, абмежаваць - і нашмат - самастойнасць свету, якому да апошняга часу ўдавалася жыць асобна ад улады, адзначае выданне.

Але рэформа культуры на гэтым не сканчаецца. На мінулым тыдні была звольненая Ірына Антонава, музейная «жалезная лэдзі». Незадоўга да звальнення яна ўступіла ў супрацьстаянне з Пуціным па пытанні аб творах мастацтва, на вяртанні якіх настойвае Германія. Некалькі дзён таму апавяшчэнне аб звальненні атрымаў Барыс Салтыкоў. Ён кіраваў Маскоўскім політэхнічным музеем і на працягу многіх гадоў спрабаваў захаваць будынак музея, размешчаны ў цэнтры Масквы, і зберагчы яго ад шматлікіх спекулянтаў нерухомасці. Іншымі словамі, культура ўслед за палітыкай і фінансамі будзе падвяргацца ўсё больш жорсткаму кантролю, які будзе ажыццяўляцца напрамую Крамлём, піша аўтар артыкула.

Пераклад: Inopressa.ru