Цукар, гарэлка і хлеб падаражэлі

Пастановай Мінэканомікі павышаюцца кошты на цукар-пясок белы без дабавак у сярэднім на 5%.

У каментары да пастановы Мінэканомікі тлумачыць сваё рашэнне неабходнасцю «стабілізацыі фінансавага стану цукраперапрацоўчых арганізацый».

Такім чынам, устаноўленыя гранічныя максімальныя рознічныя кошты на цукар-пясок белы без дабавак вагавы ў памеры 7900 рублёў за 1 кг і на цукар-пясок белы без дабавак, расфасаваны ў спажывецкую ўпакоўку аб'ёмам ад 500 гр. да 1 кг, - у памеры 8400 рублёў за 1 кг.

Пастанова ўступае ў сілу з 12 ліпеня 2013 года.

Гарэлка

З 12 ліпеня таксама павышаюцца гранічныя мінімальныя кошты на алкагольныя напоі крэпасцю звыш 28 адсоткаў, якія вырабляюцца і (або) рэалізуюцца на тэрыторыі Рэспублікі Беларусь. Гэта прадугледжана пастановай Міністэрства эканомікі №50 ад 4 ліпеня 2013 года.

Гранічны мінімальны кошт за 0,5 літра крэпасцю 40 адсоткаў у рублях (з улікам спажывецкай тары) складзе 27000 беларускіх рублёў (адпускны кошт франка-адпраўлення без ПДВ) і 38000 беларускіх рублёў (рознічны кошт з ПДВ). Гранічныя кошты выраслі на 25,6% і на 28,4% адпаведна.

Адпускны кошт на імпартныя алкагольныя напоі, якія рэалізуюцца на тэрыторыі Рэспублікі Беларусь, складзе 54 000 беларускіх рублёў без ПДВ (на 25,6%).

Хлеб

Гранічныя максімальныя адпускныя кошты па рэгулюемых групах хлеба і хлебабулачных вырабаў у Беларусі з 12 ліпеня будуць павялічаныя ў сярэднім на 10%. Гэта прадугледжана пастановай Савета Міністраў № 48 ад 4 ліпеня бягучага года.

Дакументам устаноўленыя гранічныя максімальныя адпускныя кошты на хлеб жытні і жытна-пшанічны, булачныя вырабы з пшанічнай мукі з утрыманнем па рэцэптуры цукру і тлушчаў у суме не вышэй за 14%.

Так, гранічны максімальны адпускны кошт на хлеб жытні, з сумесі жытняй і пшанічнай мукі (акрамя заварных гатункаў) без дадатковай сыравіны ўстаноўлены ў памеры Br2576 за 1 кг, на хлеб жытні, з сумесі жытняй і пшанічнай мукі, заварны без дадатковай сыравіны - Br3283 за 1 кг, батоны і перапечкі з пшанічнай мукі вышэйшага гатунку з утрыманнем па рэцэптуры цукру і тлушчаў у суме не вышэй за 14% вагой 300 г і больш - Br4961 за 1 кг, на батоны і перапечкі з пшанічнай мукі першага гатунку з утрыманнем па рэцэптуры цукру і тлушчаў у суме не вышэй за 14% вагой 300 г і больш - Br4315 за 1 кг.