Чыноўнікі правядуць аблаву на менскіх СТА

Прадстаўнікі МНС, МУС і энерганагляду будуць шукаць нелегальныя СТА ў сталічных гаражах.

Пра гэта паведаміў начальнік дзяржаўнай установы «Упраўленне бытавога і гасцінічнага абслугоўвання насельніцтва Менгарвыканкама» Андрэй Новікаў, перадае БелТА.

Створаная гарадская міжведамасная група па абследаванню гаражных масіваў, у склад якой увайшлі прадстаўнікі органаў унутраных спраў, падатковай, землеўпарадкавальнай і санітарна-эпідэміялагічнай службаў, МНС, энерганагляду. Іх мэта - спыніць факты нелегальнага аказання паслуг па рамонце аўтамабіляў.

Ужо правераныя чатыры кааператыва - «Серпантын», «Сокал-Цэнтр», «Свіслач-2008», «Малінаўка». Выяўленыя выпадкі выкарыстання гаражоў не па прамым прызначэнні, парушэнні прапускнога рэжыму, захоўвання на тэрыторыі безгаспадарных аўтамабіляў, парушэнні правілаў супрацьпажарнай бяспекі, санітарна-гігіенічных патрабаванняў.

Акрамя таго, у траўні-чэрвені праводзіўся маніторынг дзейсных станцый тэхнічнага абслугоўвання. Некаторыя аб'екты аказвалі асобныя паслугі пры адсутнасці сертыфіката адпаведнасці.

Па словах Андрэя Новікава, сфера аўтасэрвісу прывабная для бізнесу. Зямельныя ўчасткі, выстаўленыя на аўкцыёны для аказання такіх паслуг, карыстаюцца попытам. У 2012 годзе прададзена сем пляцовак, у бюджэт паступіла Br5 млрд., у 2013-м - 4, паступіла ў бюджэт больш Br7 млрд. У бліжэйшыя два-тры гады ў горадзе пабудуюць 15 шматфункцыянальных комплексаў па абслугоўванні аўтамабіляў. Тут будзе аказвацца шырокі спектр паслуг для аўтаўладальнікаў. У Менску ўжо функцыянуе некалькі падобных аб'ектаў, чакаецца, што іх стане яшчэ больш. Як паказвае аналіз наяўнага аўтапарка (у сталіцы зарэгістравана больш за 700 тыс. машын), у горадзе неабходна стварыць 45-50 такіх комплексаў.

Разам з тым актуальнай праблемай застаецца ценявы рынак. Паводле ацэнак спецыялістаў, 50% СТА працуюць нелегальна ў гаражных кааператывах.

«Неабходна зрабіць больш жорсткай адказнасць за незаконную прадпрымальніцкую дзейнасць, стымуляваць прадпрымальнікаў працаваць легальна. Упраўленне накіравала ў адпаведныя службы свае прапановы для эфектыўнай барацьбы з ценявым бізнесам», - адзначыў Андрэй Новікаў.