Пастаўкі беларускага паліва ва Украіну ўпадуць на 40%
2- 24.07.2013, 16:16
- 11,025
З запускам Украінай сваіх НПЗ пастаўкі беларускага паліва ўпадуць на 40%, лічаць эксперты.
Рэалізацыя Украінай планаў па запуску сваіх НПЗ істотна зменіць структуру напаўнення ўнутранага рынку гэтай краіны нафтапрадуктамі, пры гэтым пастаўкі беларускага паліва могуць скараціцца больш чым на 40%, лічаць эксперты ўкраінскай «кансалтынгавай групы А-95», піша «Інтэрфакс».
Як адзначаецца ў прэс-рэлізе групы, у студзені-чэрвені 2013 года Беларусь імпартавала ва Украіну 1 млн. 540,3 тыс. тон нафтапрадуктаў, што на 26,7% менш у параўнанні з першым паўгоддзем 2012 года.
У першым паўгоддзі 2014 года, па прагнозах экспертаў групы, пастаўкі беларускага паліва ва Украіну чакаюцца на ўзроўні 900 тыс. тон, што на 41,6% менш у параўнанні са студзенем-чэрвенем 2013 года.
У той жа час, разлічваюць эксперты, у студзені-чэрвені 2014 года плануецца, што Лісічанскі НПЗ (ЛІНІК) паставіць на ўнутраны рынак 1,2 млн. тон нафтапрадуктаў, а пастаўкі Адэскага НПЗ складуць 600 тыс. тон. У студзені-чэрвені 2013 года гэтыя НПЗ пастаўкі паліва на ўнутраны рынак Украіны не ажыццяўлялі.
Па дадзеных «А-95», Адэскі НПЗ адновіць сваю працу да восені гэтага года. Планаваная на першых этапах загрузка ў 200 тыс. тон нафты забяспечыць вытворчасць каля 100 тыс. тон светлых нафтапрадуктаў, што складае каля 12% паліўнага рынку Украіны.
Больш істотныя змены ў напаўненні рынку адбудуцца з аднаўленнем вясной 2014 года працы НПЗ «ЛІНІК», які належыць расейскай НК «Раснафта».
«Мінімальны аб'ём перапрацоўкі гэтага магутнага НПЗ складае каля 400 тыс. тон з выпрацоўкай парадку 270 тыс. тон бензіну і дызельнага паліва (каля 32% рынку)», - гаворыцца ў паведамленні.
З улікам бягучых аб'ёмаў Крэменчугскага НПЗ і Шабялінскага ГПЗ сумарны аб'ём перапрацоўкі ў 2014 годзе можа скласці 850 тыс. тон у месяц, ці больш за 10 млн тон у год.
«Гэта азначае, што ў 2014 годзе доля ўкраінскіх нафтапрадуктаў можа вярнуцца на адзнаку 50-60% унутранага рынку», - прыводзяцца ў паведамленні словы дырэктара «кансалтынгавай групы А-95» Сяргея Куюна.
Кіраўнік аналітычнай групы адзначае, што гэты паказчык, галоўным чынам, будзе вар'іравацца ў залежнасці ад рашэння «Раснафты» аб загрузцы «ЛІНІКа» давальніцкай сыравінай, паліва з якой будзе вяртацца назад у Расею.
Аднак, адзначаюць эксперты «А-95», праца НПЗ у бягучых умовах будзе, у лепшым выпадку, бясстратнай, што стварае рызыкі рэцыдываў прыпынення прадпрыемстваў.
«Стабільная дзейнасць галіны і яе развіццё будуць залежаць ад палітыкі ўрада па навядзенні парадку на рынку нафтапрадуктаў і стымуляванню мадэрнізацыі НПЗ. Ва Украіне працягвае функцыянаваць і расці ценявы сектар паліўнага рынку - кантрабанда і фальсіфікат, якія сталі прычынамі прыпынення ў 2010 і 2012 гадах Адэскага і Лісічанскага НПЗ адпаведна», - гаворыцца ў прэс-рэлізе.
Другім складнікам праблемы з'яўляецца тэхнічная адсталасць ўкраінскіх вытворчасцяў, якая нават у роўных умовах не дазволіць паспяхова канкураваць з замежнымі вытворцамі ні па кошце, ні па якасці.
«Уладальнікі НПЗ рана ці позна вылучаць перад урадам галоўную ўмову сваёй працы - ліквідацыю ценявога рынку, які ацэньваецца ў 30% спажывання.
Паралельна Кабінет міністраў Украіны прэвентыўна павінен укараніць на заканадаўчым узроўні льготы на ўвоз абсталявання, неабходнага для мадэрнізацыі, і адмысловы рэжым падаткаабкладання на перыяд гэтых работ», - лічыць Куюн.