МЗКЦ да распродажу гатовы

Мінскі завод колавых цягачоў прадаюць расійскай дзяржкарпарацыі «Ростех»

Дзяржкамітэт па маёмасці Беларусі прапанаваў набыць яе структурам 75% мінус адна акцыя кампаніі. Пра гэта распавёў генеральны дырэктар карпарацыі «Ростех» Сяргей Чэмезаў. Аднак здзелка можа і не адбыцца, бо ацэнкі беларускага і расійскага бакоў адрозніваюцца ў некалькі разоў, паведамляе РБК Daily.

«Цяпер праводзіцца ацэнка гэтых акцый. Разглядаецца варыянт інвеставання ў прадпрыемства з расейскага боку за кошт дадатковай эмісіі, то ёсць грошы ад продажу пойдуць на развіццё самога прадпрыемства. Магчыма, перамовы завершацца да канца гэтага года», - адзначыў ён. Для Расеі прадукцыя, якая вырабляецца дадзеным прадпрыемствам носіць стратэгічны характар. МЗКЦ вырабляе платформы для сістэм СПА і зенітных ракетных сістэм.

Крыніца, блізкая да перамоваў, распавяла, што на дадзеным этапе кошт МЗКЦ складана ацаніць: асноўны і адзіны заказчык - гэта Мінабароны РФ і, з аднаго боку, актыў вельмі цікавы для Расеі, з другога - не зусім ясныя доўгатэрміновыя перспектывы прадпрыемства. Па словах Сяргея Чэмезава, «пра кошт пакуль казаць рана, так як due diligence яшчэ не праводзілася». Нейкім козырам у перамовах можа стаць і тое, што КамАЗ (у якім «Растэху» належыць 49,9% акцый) плануе пачаць самастойную вытворчасць аналагічных платформаў у 2016 годзе.

Дырэктар аналітычнага дэпартамента ВК «Рэгіён» Валерый Вайсберг адзначае, што, паводле справаздачнасці МЗКЦ, прадпрыемства можа каштаваць прыкладна 31 млн дал Яго кошт будзе расці, так як выручка расце пры захаванні сярэдняй рэнтабельнасці 15%, адзначае эксперт. Згодна са справаздачнасцю МЗКЦ, у 2010 годзе выручка завода склала 36,5 млн дал, у 2011 годзе яна складала ўжо 61,8 млн дал, а ў 2012 годзе завод зарабіў 130,5 млн дал Адна з крыніц РБК daily, знаёмая са здзелкай, адзначае, што добрыя фінансавыя паказчыкі даюць падставу беларускаму боку прасіць за прадпрыемства ў чатыры разы больш.

«Растэх» не адзінае прадпрыемства, якое цікавіцца Менскім заводам. Цікавасць да завода праяўлялі холдынг «Алмаз-Антэй» і «Рускія машыны». Раней урад Ніжагародскай вобласці паведаміў, што 3 красавіка губернатар рэгіёну Валерый Шанцаў падпісаў у Менску пагадненне, у якім быў прапісаны намер набыць кантрольны пакет акцый менскай вытворчасці Ніжнегародскім машынабудаўнічым заводам, які ўваходзіць у канцэрн СПА «Алмаз-Антэй». Аднак расейскі ўрад прыняў рашэнне, што інтэграцыяй МЗКЦ у абаронны комплекс будзе займацца «Растэх», як адзіны эксклюзіўны партнёр з боку Расеі.

МЗКЦ на 100% належыць Дзяржкамітэту па маёмасці Рэспублікі Беларусь, аднак аператыўнае кіраванне заводам ажыццяўляе Дзяржаўны ваенна-прамысловы камітэт (ДВПК). Акрамя спецтэхнікі, што выпускаецца пад маркай Volat, прадпрыемства робіць шасі для сістэм СПА С-300 і С-400, комплексаў «Іскандэр», «Ураган», «Смерч», «Град». Раней паведамлялася, што прадпрыемства да 2017 года павялічыць гадавы аб'ём вытворчасці ў пяць разоў, да 500 млн дал «90% яго прадукцыі пастаўляецца ў Расею», - адзначае крыніца. На самім МЗКЦ пытанні не сталі каментаваць.

Перамовы вядуцца не толькі аб уключэнні МЗКЦ у «Растэх» - у расейскага і беларускага бакоў яшчэ адна аўтамабільная цікавасць. Краіны ўжо другі год абмяркоўваюць перспектывы аб'яднання КамАЗа і МАЗа. У лютым 2011 года дзяржкарпарацыя «Растэх» прапанавала кіраўніцтву Беларусі аб'яднаць дзве кампаніі ў адну, у выніку чаго КамАЗ стаў бы ўладальнікам 100% акцый МАЗа, а ўлады Беларусі атрымалі пакет акцый КамАЗа. Але першы віцэ-прэм'ер беларускага ўрада Уладзімір Сямашка заявіў, што беларускі бок хацеў бы захаваць кантрольны пакет акцый МАЗа. У адказ на гэта Масква прапанавала стварыць сумеснае прадпрыемства «Расбелаўта» на базе МАЗа і КамАЗа. «Зараз бакі прапрацоўваюць розныя сцэнары супрацоўніцтва, ад стварэння СП да пераходу на адну акцыю, аднак пакуль казаць пра гэта заўчасна», - заявіў Сяргей Чэмезаў.