Міліцэйскія «тэатралы» прыйшлі паглядзець на Майкла Атэнбора
27- 7.07.2013, 20:13
- 27,322
Супрацоўнікі міліцыі зноў сарвалі спектакль Свабоднага тэатра ў Менску.
Пра гэта паведаміў на сваёй старонцы ў сацыяльнай сетцы «Фэйсбук» арт-дырэктар Свабоднага тэатра Мікалай Халезін.
«Сёння ў Свабодным тэатры зноў госці - супрацоўнікі міліцыі перапісваюць пашпартныя звесткі гледачоў і актораў. А сярод гледачоў сёння - камандор ордэна Брытанскай імпэрыі Майкл Атэнбора, які прыляцеў у Менск, каб выкладаць у нашай тэатральнай лабараторыі Fortinbras.
Падчас міліцэйскага рэйду ў тэатр затэлефанаваў Міхаіл Барышнікаў, каб падтрымаць беларускіх актораў. Ён выйшаў на сувязь адразу пасля сваёй прэм'еры, якая адбылася ў Манчэстэры», - напісаў ён.
Супрацоўнікі міліцыі не першым разам спрабуюць сарваць паказ Свабоднага тэатра. Яны неаднаразова прыходзілі ў памяшканне, дзе ішлі спектаклі, спасылаючыся на тое, што іх выклікалі суседзі.
Паказ, які «тэатралы» з міліцыі наведалі сёння, называўся «Шчаслівых Калядаў, міс Мідаўс».