Дыктатар пагражае адкруціць галовы чыноўнікам

Лукашэнка ў чарговы раз абрынуўся з пагрозамі на сваіх падначаленых.

Як паведамляе ОНТ, беларускі кіраўнік пабываў у Магілёўскай вобласці. У разгар уборачнага і нарыхтоўчага сезону гаворка ішла пра тое, «як працу аграрнага сектара зрабіць больш эфектыўнай і рэнтабельнай».

На палях сельгаспрадпрыемства «Александрыйскае» Шклоўскага раёна ён азнаёміўся з сучаснымі тэхналогіямі нарыхтоўкі кармоў. Гаворка ішла пра выкананне даручэнняў па стварэнні айчыннай корманарыхтоўчай тэхнікі.

«За гэты сезон мы павінны вызначыцца, - сказаў Лукашэнка. - Вядома, пажадана вырабляць усю гаму неабходнай тэхнікі... Тэхніку трэба рабіць аптымальную, рацыянальную. І тэхніку трэба рабіць эканамічную. Вы за гэта адкажаце галавой. Яшчэ больш галавой адкажаце за якасць. Вось гэтага я вам ніколі не дарую. Цяп-ляп не трэба. У адваротным выпадку з дырэктара здымем галаву, які вырабляе гэтую тэхніку ».

Ён таксама звярнуў увагу на праблему збыту беларускай сельгастэхнікі. На яго думку, назапашаную на складах прадпрыемстваў тэхніку, якая не знайшла збыту за мяжой, варта накіраваць у сельскагаспадарчыя арганізацыі.

Нагадаем, за апошні час складскія запасы ў Беларусі б'юць новыя рэкорды.