Украінскі рэктар-хабарнік затрыманы ў Беларусі?

Украінскія СМІ паведамілі аб затрыманні Пятра Мельніка беларускімі памежнікамі.

Былы рэктар Нацыянальнага універсітэта Дзяржаўнай падатковай службы Украіны спрабаваў уехаць на тэрыторыю нашай краіны па дакументах брата. На беларускім прапускным пункце «Верхні Церабежаў» ён быў затрыманы памежнікамі. Пасля гэтага Пётр Мельнік быў перададзены ўкраінскім уладам.

Падрабязнасці аб яго затрыманні паведаміў памочнік начальніка Пінскага пагранічнага атрада Беларусі па працы з СМІ Міхаіл Бут-Гусаім, піша «Тиждень.ua».

«... І быў затрыманы і прыцягнуты да адміністрацыйнай (адказнасці) за парушэнне правілаў знаходжання на тэрыторыі Рэспублікі Беларусь без адпаведных дакументаў, а менавіта - пашпарта. І быў перададзены ГПС (Дзяржпагранслужба) Украіны», - паведаміў ён.

Пётр Мельнік паспрабаваў перасекчы мяжу з нашай краінай 9 жніўня.

Пагранведамства Украіны абвяргае інфармацыю аб затрыманні Мельніка ў Беларусі і перадачы ўкраінскай старане. «Ніякіх затрыманняў Мельніка беларуская старана не ажыццяўляла. Адпаведна, нам яго ніхто не перадаваў», - паведамілі ў прэс-службе ўкраінскага пагранведамства.

Пра тое, што Пётр Мельнік, які быў аб'яўлены ў міжнародны вышук, па пашпарце брата выехаў у Беларусь, сёння паведамілі некаторыя СМІ суседняй дзяржавы.

Выданне gazata.ua некалькі гадзін таму апублікавала фотакопію «Даведкі аб перасячэнні ўкраінска-беларускай мяжы грамадзянінам П.Мельнікам». З дакумента вынікае, што ў 03:15 9 жніўня да ўкраінскага аўтамабільнага прапускнога пункта «Гарадзішча» пад'ехаў ВАЗ - 2105. За рулём быў ўладальнік Пётр Грыневіч. Экс-рэктар знаходзіўся на пасажырскім сядзенні. Да лініі кантролю аўтамабіль праехаў па «зялёным» калідоры.

Нагадаем, Пётр Мельнік быў затрыманы 27 ліпеня супрацоўнікамі Галоўнага ўпраўлення ўнутранай бяспекі Міністэрства даходаў і збораў сумесна з ГУБАЗ МУС Украіны. Ён патрабаваў і атрымаў ад двух украінцаў хабару ў памеры 40 тыс. грн і 80 тыс. грн за паступленне іх сваякоў у ВНУ.

Пячэрскі райсуд Кіева 1 жніўня выбраў для яго меру стрымання ў выглядзе ўтрымання пад хатнім арыштам. 9 жніўня стала вядома, што Пётр Мельнік збег, пазбавіўшыся ад электроннага бранзалета. МУС абвясціла яго ва ўсеўкраінскі вышук. 14 жнўня Інтэрпол абвясціў яго ў міжнародны вышук.